अल्पवयीन मुलीची हत्या करून मृतदेह जाळला

म. टा. खास प्रतिनिधी, मुंबई
अल्पवयीन मुलीशी अतिप्रसंग करताना मुलीने प्रतिकार केल्याने तिची हत्या करून मृतदेह जाळण्याचा अमानुष प्रकार उघडकीस आला आहे. या नराधमास समता नगर पोलिसांनी रविवारी अटक केली. त्याच्याविरोधात पोलिसांनी पोक्सोसह अन्य कायद्यान्वये गुन्हे नोंदविले असून, त्यास २५ नोव्हेंबरपर्यंत पोलिस कोठडी सुनावण्यात आली आहे.

समता नगरमध्ये १ ऑक्टोबर रोजी एका अल्पवयीन मुलीस पळवून नेल्याचा गुन्हा नोंदविण्यात आला होता. त्याचा तपास करताना पोलिसांनी मोबाइल फोन लोकेशन, टॉवरच्या सहाय्याने माग घेण्यास सुरुवात केली. त्यातून एका व्यक्तीवर संशय येऊन पोलिसांनी त्याच्याकडे चौकशी सुरू केली. चौकशीवेळी पोलिसांची दिशाभूल करण्याचा या व्यक्तीचा प्रयत्न होता. मात्र, पोलिसांचा त्याच्यावरील संशय कायम राहिला आणि पुढील तपास करून पोलिसांनी त्यास १७ नोव्हेंबर रोजी अटक केली. अटकेनंतरच्या चौकशीत पोलिसांनी आपला खाक्या दाखवताच या व्यक्तीने गुन्ह्याची कबुली दिली.

या नराधमाने अल्पवयीन मुलीस दुपारच्या वेळेस घरी बोलावले आणि अतिप्रसंगाचा प्रयत्न केला. मुलीने बचावासाठी आरडाओरडा सुरू करताच संतापलेल्या त्या नराधमाने हाती लागलेली पाण्याची जड बाटली मुलीच्या डोक्यावर जोरात मारली. त्यानंतर त्याने मुलीची गळा दाबून हत्या केली. एका मोठ्या बॅगेत मुलीचा मृतदेह भरून त्याने तो तलासरीत नेला. तिथे तो मृतदेह जाळून टाकला.

अतिरिक्त पोलिस आयुक्त दिलीप सावंत, उपायुक्त डॉ. डी. एस. स्वामी, एसीपी लक्ष्मण चव्हाण आदी वरिष्ठ अधिकाऱ्यांनीही या प्रकरणातील तपासावर लक्ष ठेवले. ही कारवाई वरिष्ठ पोलिस निरीक्षक राजू कसबे, निरीक्षक रणशेवरे, ए.पी.आय. रविराज जाधव, पी.एस.आय. दत्तात्रय पाटील, अनिल हाडळ यांच्या पथकाने पूर्ण करून गुन्हेगारास जेरबंद केले.