गीतरामायण एक्स्प्रेस नोव्हेंबरमध्ये धावणार
म टा विशेष प्रतिनिधी, मुंबईमहाराष्ट्रातील तीन दिग्गज कलाकार ग दि माडगूळकर, सुधीर फडके आणि पु ल...
म. टा. विशेष प्रतिनिधी, मुंबई
महाराष्ट्रातील तीन दिग्गज कलाकार ग. दि. माडगूळकर, सुधीर फडके आणि पु. ल. देशपांडे यांचे जन्मशताब्दी वर्ष सध्या महाराष्ट्र सरकारतर्फे साजरे करण्यात येत आहे. गदिमा आणि बाबूजी यांच्या जन्मशताब्दीनिमित्त मुंबई-पुणे एक्स्प्रेसला 'गीतरामायण एक्स्प्रेस' नाव देण्यात यावे, अशी इच्छा माडगूळकर कुटुंबीयांनी व्यक्त केली होती. '८ नोव्हेंबरला जन्मशताब्दी महोत्सव संपण्यापूर्वी ही प्रक्रिया पूर्ण होईल', असे आश्वासन सांस्कृतिक कार्यमंत्री विनोद तावडे यांनी 'महाराष्ट्र टाइम्स'शी बोलताना दिले.
माडगूळकर कुटुंबीयांनी मुख्यमंत्री देवेंद्र फडणवीस, सांस्कृतिक कार्यमंत्री तावडे आणि रेल्वेमंत्री पीयूष गोयल यांना यासंदर्भात पत्र पाठवून विनंती केली होती. गीतांजली एक्स्प्रेस, तुतारी एक्स्प्रेस याप्रमाणे गदिमा आणि बाबूजींच्या आठवणी चिरंतन ठेवण्यासाठी आणि त्यांनी गीतरामायणाच्या माध्यमातून घडवलेला इतिहास जपण्यासाठी मुंबई-पुणे एक्स्प्रेसला 'गीतरामायण एक्स्प्रेस'चे नाव देण्यात यावे, असा त्यांचा प्रस्ताव होता. यासंदर्भात सांस्कृतिक कार्यमंत्र्यांनी हिरवा कंदील दाखवल्याने त्यांच्या मार्गदर्शनाखाली रेल्वेमंत्र्यांची भेट घेण्यासाठी प्रयत्न करण्यात येतील, असे गदिमांचे नातू सुमित्र माडगूळकर यांनी सांगितले.