उत्तम आरोग्याची गुरुकिल्ली

म. टा. खास प्रतिनिधी, मुंबई

धकाधकीचे आयुष्य, वेगाने बदलत्या जीवनशैलीमध्येही सक्षम आरोग्य जपण्यासाठी नेमके काय करावे याची गुरुकिल्ली देणारा 'दीर्घायु भव' हा 'महाराष्ट्र टाइम्स'चा आरोग्य विशेषांक आज, शुक्रवारी प्रसिद्ध होत आहे. अनारोग्याच्या समस्या निर्माण झाल्यानंतर आरोग्याचा विचार करण्यापेक्षा आरोग्य बिघडू नये यासाठी काय करायला हवे, हा प्रयत्न 'दीर्घायु भव'च्या माध्यमातून करण्यात आला आहे.

वैद्यकीय क्षेत्रातील तज्ज्ञांनी सोप्या-सहज भाषेत आरोग्याशी निगडित विविध विषयांबद्दल मार्गदर्शन केले आहे. शेकडो वर्षांची परंपरा असलेल्या आयुर्वेदाचे आरोग्य क्षेत्रातील महत्त्व काय आहे, डोळ्यांची निगा कशी राखावी, वैद्यकीय तपासण्या का कराव्यात अशा महत्त्वाच्या विषयांवर या विशेषकांमध्ये मार्गदर्शन करण्यात आले आहे.

अलीकडे भाज्यांमध्ये रासायनिक पदार्थांचा वापर वाढता आहे, त्यामुळे नेमक्या कोणत्या भाज्या खाव्यात याबद्दल संभ्रम असतो. दैनंदिन आहारामध्ये ठरवून काही भाज्यांचा समावेश केल्यास शारीरिक स्वास्थ्य राखता येते, हे 'भाज्या आणि शारीरिक तंदुरुस्ती' या लेखातून नेमकेपणाने समजावण्यात आले आहे. शरीराच्या विविध अवयवांची काळजी घेताना डोळ्यांची निगा ठरवून राखली जात नाही. मोबाइल, इंटरनेटचा वापर वाढता असल्यामुळे डोळ्यावर येणारा ताणही वाढता आहे. अशावेळी डोळ्यांची निगा कशी राखावी याचे मार्गदर्शन अंकात आहे.

आहारामुळे ताणतणावांना दूर कसे ठेवता येते, खाण्याच्या योग्य वेळा अन् चांगल्या सवयी कोणत्या हे अनेकांना माहीत नसते. त्यामुळे गरज नसतानाही सतत खाल्ले जाते. सक्षम आरोग्यासाठी नेमके काय व किती खावे, याचा बहुमोल आरोग्यमंत्र 'खाण्याच्या सुयोग्य सवयी' या लेखातून देण्यात आला आहे. आरोग्याच्या प्रश्नांवर चर्चा करताना आरोग्यविषयक चाचण्या व तपासण्यांचा मुद्दा आवर्जून चर्चेत येतोच. या तपासण्या किती व कधी कराव्यात, त्या का कराव्यात यासंदर्भात प्रश्न असतात. त्यांची उत्तरे नेमकेपणाने मिळत नाही. या तपासण्या व उपचारांची दिशा निश्चित होण्याच्या दृष्टीने मदतगार ठरू शकतात. या तपासण्या नेमक्या केव्हा व कशा कराव्यात याची माहिती 'दीर्घायु भव' या आरोग्य विशेषांकामध्ये देण्यात आली आहे. ३० रुपये मूल्य असणारा हा आरोग्य विशेषांक आजपासून सर्वत्र उपलब्ध आहे.

महत्त्वाचे विषय

आरोग्यविमा - एक शाश्वत सत्य

मधुमेह आणि पायांच्या जखमा

आवाजाचं तंत्र

सुपरफूड्स - गैरसमज आणि वास्तव

स्वयंपाकघरातील नैसर्गिक पेनकिलर्स

व्यायामातील गुंतवणूक महत्त्वाची

अन्न हे पूर्णब्रह्म

सुंदर मी होणार

रानभाज्यांचा मेवा

झोप आणि मानसिक स्वास्थ

मुलांमधील अस्थिविकृती

मोतिबिंदू शस्त्रक्रियेतील क्रांती

आहाराने घालवा ताण