दोन्ही काँग्रेस आमदारांची उद्या बैठक
म टा...
म. टा. प्रतिनिधी, मुंबई
मराठा आरक्षणाच्या प्रश्नावर सखोल विचारविनिमय करून त्याबाबतची आणखी स्पष्ट भूमिका निश्चित करण्यासाठी दोन्ही काँग्रेसच्या उभय सभागृहांतील आमदारांची तातडीची बैठक स्वतंत्रपणे मुंबईत आयोजित करण्यात आली आहे, अशी माहिती राष्ट्रवादी काँग्रेसचे नेते अजित पवार आणि काँग्रेस पक्षाचे विधानसभेतील विरोधी पक्षनेते राधाकृष्ण विखे पाटील यांनी शनिवारी पत्रकारांना दिली.
मराठा आरक्षणाच्या प्रश्नावर अचानक गटनेत्यांची सर्वपक्षीय बैठक बोलाविण्यात आली. महाराष्ट्रात सध्या अस्वस्थता निर्माण झाली आहे. लाखालाखांचे ५८ मोर्चे काढणाऱ्या मराठा समाजातील तरुणांमध्ये सरकारच्या भूमिकेबद्दल चीड निर्माण झाली आहे. मराठा समाजातील आमदारांनासुद्धा तरुणांच्या संतापाला सामोरे जावे लागत आहे. त्यामुळे राष्ट्रवादी काँग्रेसच्या उभय सभागृहांतील आमदारांची तातडीची बैठक उद्या, सोमवारी दुपारी १२ वाजता विरोधी पक्षनेते धनंजय मुंडे यांच्या बंगल्यावर आयोजित करण्यात आल्याची माहिती राष्ट्रवादीचे नेते अजित पवार यांनी दिली.
मराठा आरक्षण संसदेत मंजूर होण्यासाठी दोन तृतीयांश संख्याबळ आवश्यक असून ते मोदी सरकारकडे नाही. यामुळे संसदेत गुजर, पटेल, धनगर आणि मुस्लिम आरक्षणाचा प्रश्नही येऊ शकतो. यावर मार्ग काढण्यासाठी विरोधकांचे सहकार्य मिळवून देण्याची क्षमता राष्ट्रवादीचे नेते शरद पवार यांच्याकडे आहे. त्यासाठी केंद्राने शरद पवार यांची मदत घ्यावी, असे अजित पवार म्हणाले. मराठा आरक्षण संसदेत दोन तृतीयांश बहुमताने मंजूर करून घेण्यासाठी मायावती, ममता बॅनर्जी, चंद्राबाबू नायडू, अखिलेश यादव तसेच शिवसेनेची मदत लागेल. याबद्दल भाजपने आग्रही भूमिका मोदींकडे मांडण्याची आवश्यकता आहे, असे अजित पवार म्हणाले.
दरम्यान, मराठा आरक्षणाबाबत पुढील रणनीती ठरविण्यासाठी काँग्रेस पक्षाच्या आमदारांचीही बैठक उद्या, सोमवारी आमंत्रित करण्यात आली आहे, असे विरोधी पक्षनेते विखे पाटील यांनी सांगितले.