नव्या मेट्रोंनाही चारकोपचा आसरा
कारडेपोअभावी मेट्रो ७ प्रकल्पाला उशीर होणे टळणारदहिसर कारडेपोचा प्रश्न निकाली निघेपर्यंत व्यवस्थातोपर्यंत मेट्रो ७च्या गाड्यांचा भार चारकोप ...
कारडेपोअभावी मेट्रो ७ प्रकल्पाला उशीर होणे टळणार
दहिसर कारडेपोचा प्रश्न निकाली निघेपर्यंत व्यवस्था
तोपर्यंत मेट्रो ७च्या गाड्यांचा भार चारकोप डेपोवर
म. टा. प्रतिनिधी, मुंबई
येत्या वर्षअखेरीस मुंबईकरांच्या सेवेत येण्यासाठी सज्ज असलेल्या मेट्रो २ बी प्रकल्पासोबत मेट्रो ७ प्रकल्पातील गाड्याही चारकोप कारडेपोचा आसरा घेतील या निर्णयावर एमएमआरडीएच्या वरिष्ठ अधिकाऱ्यांकडून शिक्कामोर्तब करण्यात आले आहे. या निर्णयामुळे कारडेपोअभावी मेट्रो ७ प्रकल्पाला उशीर होण्याच्या चर्चांना तूर्तास पूर्णविराम मिळाला आहे. दहिसर कारडेपोचा प्रश्न निकाली निघेपर्यंत मेट्रो ७च्या गाड्यांचा भार चारकोप डेपोवर असेल.
मेट्रो ७ या मार्गाच्या डेपोसाठी, दहिसर येथील एका जागेचा विचार करण्यात आला होता. ही जागा एमएमआरडीएला मेट्रो कारडेपोसाठी मिळणार होती. मात्र, या जागेचा प्रश्न उच्च न्यायालयात प्रलंबित असल्याने मेट्रो ७ प्रकल्पातील गाड्या कुठे उभे करायच्या, असा प्रश्न उपस्थित झाला होता. त्यात या प्रकल्पाला ऑक्टोबर २०२०ची मुदत असल्याने प्रकल्प पूर्ण होण्यापूर्वी कारडेपो नसल्यास या मार्गावरील सेवा सुरू होण्यास विलंबाची शक्यता होती. मात्र, सद्यस्थितीत २४ गाड्या उभ्या करण्याची क्षमता असलेल्या चारकोप डेपोमध्येच मेट्रो ७ व २ बी या दोन्ही मार्गांवर धावणाऱ्या गाड्या उभ्या होतील हे स्पष्ट झाले आहे. चारकोप डेपोचे कामही अंतिम टप्प्यात (९० ते ९२ टक्के) असून, दोन्ही प्रकल्प ठरलेल्या मुदतीतच कार्यान्वित होतील याबाबत एमएमआरडीए प्रशासनाने विश्वास व्यक्त केला आहे.
या दोन्ही मार्गांवरील मेट्रो गाड्यांचे कंत्राट 'मेक इन इंडिया' अंतर्गत भारत अर्थ मूव्हर्स लिमिटेड या कंपनीला देण्यात आले आहे. साधारण जुलै महिन्यापर्यंत १२ गाड्या मुंबईत दाखल होण्याची शक्यता असून, त्यानंतर उर्वरित गाड्या टप्प्याटप्प्याने मुंबईत येतील. पहिल्या टप्प्यातील गाड्या येताच तत्काळ प्रत्यक्ष चाचण्या सुरू करण्यात येतील, असे एका वरिष्ठ अधिकाऱ्याने सांगितले.
पादचारीस्नेही स्थानके
या दोन्ही मार्गांवरील सर्व स्थानके पादचारीस्नेही कशी होतील याकडे एमएमआरडीएने विशेष लक्ष केंद्रीत केले आहे. यासाठी प्रत्येक स्थानकाबाहेरील ठराविक (उपलब्धतेनुसार) जागा रिक्षा, बस, खासगी वाहने आदी इतर वाहतुकीच्या साधनांसाठी राखीव ठेवण्यात येणार आहे. जेणेकरून प्रवासी स्थानकांतून बाहेर पडताच त्यांना कमीत कमी वेळेत पुढील प्रवासासाठी वाहने उपलब्ध होतील. विशेष म्हणजे, या परिसरात झाडांची लागवड करण्यात येणार असून, बसण्यासाठी उत्तम आसनव्यनस्था निर्माण करण्याचाही विचार सुरू आहे.
नव्या निविदा निघाल्या
वर उल्लेख केलेल्या मार्गांवरील कामात दिरंगाई केल्याबद्दल अलीकडेच एमएमआरडीएकडून सिम्प्लेक्स, राधा कन्स्ट्रक्शन या कंपन्यांना नारळ देण्यात आला होता. त्यामुळे उर्वरित कामासाठी नवीन कंत्राटदार नेमण्यासाठी एमएमआरडीएतर्फे निविदा निघाल्या असून, पुढील ४५ दिवसांत सर्व प्रक्रिया पूर्ण होऊन प्रत्यक्ष काम सुरू होईल, असा विश्वास अधिकाऱ्यांकडून व्यक्त होत आहे.