Mumbai News : मुंबईत एप्रिलच्या मध्यापासून करोना रुग्णसंख्येत घट

म. टा. विशेष प्रतिनिधी, मुंबई : करोना संसर्ग नियंत्रणात येत असून रुग्णसंख्येमध्ये सातत्याने घट होत आहे. एप्रिलच्या मध्यापासून करोनारुग्णांच्या संख्येत तब्बल पाच हजारांनी घट झाली आहे. १४ ते २० एप्रिल या आठवड्यामध्ये राज्यामध्ये सहा हजार १२९ रुग्णांची नोंद झाली होती. मात्र ५ ते ११ मे या आठवड्यात करोना रुग्णसंख्या एक हजार २१० इतकी नोंदवली गेली. घटती रुग्णसंख्या ही करोना संसर्ग नियंत्रणात येत असल्याचे लक्षण असल्याचे वैद्यकीय तज्ज्ञांनी सांगितले.

जागतिक आरोग्य संघटनेने करोना आणीबाणी संपुष्टात आल्याचे जाहीर केले असले, तरीही राज्य सरकारने करोनाविरोधातील लढा कायम ठेवला आहे. रुग्णांच्या अधिकाधिक चाचण्या करण्यावर भर देण्यासह रुग्णांचा पाठपुरावा, विलगीकरण, लसीकरण आणि योग्य उपाययोजनांवर भर कायम ठेवला आहे.

बरे होणाऱ्या रुग्णांची संख्या अधिक

मागील काही दिवसांपासून करोनाबाधित रुग्णांच्या तुलनेत बरे होणाऱ्या रुग्णांची संख्या अधिक आहे. १४ एप्रिल ते ११ मे या चार आठवड्यांच्या कालावधीमध्ये राज्यात तब्बल चार हजार ९१९ रुग्णांची घट झाली. १४ ते २० एप्रिल या आठवड्यात सहा हजार १२९ रुग्णांची नोंद झाली. त्यानंतर २१ ते २७ एप्रिल या आठवड्यामध्ये करोनारुग्णांची संख्या ४ हजार ८७४ इतकी नोंदवण्यात आली. या रुग्णसंख्येत १,२५५ने रुग्णसंख्येत घट झाली. त्यापुढील आठवड्यात २८ एप्रिल ते ४ मे दरम्यान करोना रुग्णसंख्या दोन हजार ४८७ इतकी नोंदवली गेली. म्हणजेच मागील आठवड्याच्या तुलनेत रुग्णसंख्येत तब्बल दोन हजार ३८७ने घट झाली. तर ५ ते ११ मे या आठवड्यामध्ये रुग्णसंख्या एक हजार २१० इतकी नोंदवण्यात आली. १४ ते २० एप्रिल या आठवड्याच्या तुलनेत तब्बल चार हजार ९१९ रुग्ण कमी नोंदवले गेले.

लसीकरणामुळे नियंत्रण शक्य

लसीकरणामुळे करोना रुग्णसंख्या आटोक्यात आणणे शक्य झाले, असा विश्वास संसर्गजन्य आजाराचे तज्ज्ञ डॉ. आर. एस. पाटील यांनी व्यक्त केला.