म. टा. खास प्रतिनिधी, मुंबई
बेस्ट उपक्रमातील कामगारांना करोनाची लागण होण्याचे प्रमाण चिंताजनक ठरू लागले आहे. शनिवारी एकाच दिवसात बेस्टच्या १४ कामगारांना करोनाचा संसर्ग झाल्याचे स्पष्ट झाले आहे. त्यामुळे आत्तापर्यंत करोनाग्रस्त कामगारांची एकूण संख्या १९० वर पोहोचली आहे. तर, करोनावर यशस्वी मात करणाऱ्यांची संख्या ९० झाली आहे. करोनाशी लढताना मृत्युमुखी पडलेल्या कामगारांची एकूण संख्या आठ आहे.
बेस्टकडून अत्यावश्यक सेवेतील कामगारांसाठी वाहतूक सेवा देणाऱ्या बेस्ट कामगारांना करोनाची सर्वाधिक भीती आहे. बेस्टतर्फे दररोज सुमारे १६०० बस चालविल्या जातात. त्यात काही सार्वजनिक रुग्णालयांतील कर्मचाऱ्यांना रुग्णालयापासून ते घरापर्यंत सेवा दिली जाते. त्यासह पोलिस दलासह इतर सेवांतील कर्मचाऱ्यांसाठी देखील बससेवा चालविली जाते. मात्र, ही संख्या अपुरी ठरत असल्याने बऱ्याचशा बसमध्ये सामाजिक वावराचे कोणतेही निर्बंध पाळले जात नसल्याचे आढळून आले. त्यामुळेच बेस्ट कामगारांमध्ये करोना संसर्ग वाढत असल्याचे कामगारांचे म्हणणे आहे.
अपुऱ्या सुविधांची समस्या कायम
बेस्ट उपक्रमाकडून यापूर्वी कामगारांना सुविधा देण्यातही हलगर्जीपणा झाल्याचे वारंवार आढळून आले आहे. हातमोजे, मास्क, सॅनिटायझर वगैरे आवश्यक साहित्यांचा पुरवठा न झाल्याच्या तक्रारी सतत केल्या जात होत्या. परंतु त्याकडे दुर्लक्ष केल्याची किंमत कामगारांना सोसावी लागत असल्याची टीका केली जात आहे.