पालिकेसह पोलिसही सज्ज

म. टा. विशेष प्रतिनिधी, मुंबई

आज, अनंत चतुर्दशीला मुंबईतील सार्वजनिक गणशोत्सव मंडळांतील बाप्पांसह घरगुती बाप्पांचेही विसर्जन होणार असल्याने महापालिकेने जय्यत तयारी केली आहे. गिरगाव, दादर, जुहू या चौपाट्यांसह अन्य सुमारे १०० विसर्जनस्थळी पालिकेचे हजारो कर्मचारी रात्रंदिवस विसर्जनाच्या नियोजनात गुंतले आहेत. विसर्जनासाठी २,४१७ अधिकाऱ्यांसह ६,१८७ कामगार चौपाट्यांसह विसर्जनस्थळी तैनात ठेवण्यात आले आहेत. तर, पोलिसांची कुमकही सुरक्षेसाठी सज्ज आहे.

मुंबई शहरासह उपनगरांत अनंत चतुर्दशीला सुमारे आठ ते दहा हजार सार्वजनिक मंडळांच्या गणरायांचे आणि लाखो घरगुती गणपतींचे विसर्जन होते. या दिवशी गिरगाव चौपाटीसह दादर, वरळी, माहीम, जुहू, वेसावे, गोराई, मढ, मार्वे या चौपाट्यांसह ठिकठिकाणचे तलाव अशी सुमारे १०० पेक्षा जास्त विसर्जनस्थळे लाखो गणेशभक्तांनी फुलून जातात. त्याठिकाणी विविध प्रकारची सेवा-सुविधा पालिकेतर्फे पुरवण्यात आली आहे. तर, या सूंपूर्ण विसर्जन मिरवणुकीत कोणताही गैरप्रकार होऊ नये यासाठी पोलिसही सज्ज झाले आहेत. पोलिसांच्या मदतीसाठी एनएसएस आणि एनसीसीचे विद्यार्थीही सहभागी होणार आहेत.

पालिका सज्ज

- सागरकिनारी वाळूमध्ये गणपतीच्या गाड्या व ट्रॉली रूतू नयेत यासाठी ८४० पेक्षा जास्त स्टील प्लेट टाकण्यात आल्या आहेत.

- ५८ नियंत्रण कक्ष

- ६०७ जीवरक्षक तैनात करण्यात आले आहेत.

- चौपट्यांवर भाविकांसाठी ७४ प्रथमोपचार केंद्रे व ६० पेक्षा जास्त रुग्णवाहिका तैनात.

- ८१ मोटरबोट सज्ज.

- १९२ निर्माल्य वाहने व २०० निर्माल्य कलश

- एक हजार ९९१ फ्लड लाइट, १,३०१ सर्च लाइट,

- आवश्यकतेनुसार विद्युत व्यवस्था, संरक्षक कठडे.

- ४८ निरीक्षण मनोरे, ५०हून जास्त तराफा.

- आवश्यक सफाई कामगारांसह १५० पेक्षा जास्त फिरती शौचालये.

पोलिसांची तयारी

मुंबई पोलिस - ५० हजार अधिकारी व कर्मचारी

एसआरपीएफ - बारा कंपन्या

रॅपिड अॅक्शन फोर्स - एक कंपनी

अतिरिक्त कुमक - फोर्स वन, क्यूआरटीची पथके

बॉम्बशोधक व नाशक पथक, श्वान पथके

वाहतूक पोलिस - ३,१६१

ट्रॅफिक वॉर्डन - दीड हजार

विद्यार्थ्यांचा सहभाग

एनएसएस - प्रत्येक बिटवर २५ व प्रत्यक्ष चौपाटीवर असे मिळून एकूण ३,००० विद्यार्थी

एनसीसी - दोन हजार विद्यार्थी

विसर्जनानंतर 'क्लीन अप' मोहीम

अनंत चतुर्दशीला गिरगाव चौपाटीवर घरगुती व सार्वजनिक गणपतींचे विर्सजन झाल्यानंतर दुसऱ्या दिवशी म्हणजे उद्या, २४ सप्टेंबरला 'क्लीन अप' मोहीमही हाती घेण्यात येणार आहे. चौपाटी स्वच्छ करण्याच्या कामी मुंबई महापालिकेला सहकार्य करण्याच्या उद्देशाने ही मोहीम राबवली जाणार आहे. त्यात इच्छुक पर्यावरणप्रेमी व गणसेवकांनाही सहभाग घेता येईल. त्यासाठी ९६९९८४४९८८ (अशोक) किंवा ९१६७९५५९१५ (कपील) या क्रमांकांवर संपर्क साधावा.

स्वच्छता मोहीम

विसर्जनावेळी चौपाट्यांवर कचरा होऊ नये यासाठी विविध स्वयंसेवी संस्थांचे कार्यकर्ते कार्यरत असणार आहेत. याचबरोबर एनएसएसचे विद्यार्थीही यात सहभागी होणार आहेत. यानंतर उद्या, सोमवारी गिरगाव चौपाटी येथे पालिका कर्मचाऱ्यांसोबत विविध शाळांमधील व एनएसएसचे विद्यार्थी मिळून सुमारे १२०० विद्यार्थी स्वच्छता मोहिमेत सहभागी होणार आहेत, तर जुहू येथे ६०० विद्यार्थी सहभागी होतील, अशी माहिती शुभजीत मुखर्जी यांनी दिली. उद्या, सोमवारपासून एनएसएसचे सर्व विद्यार्थी 'स्वच्छता हीच सेवा' हे ब्रीदवाक्य घेऊन काम करणार असल्याचे एनएसएसचे राज्य संचालक डॉ. अतुल साळुंखे यांनी सांगितले.