मराठी नाट्यसंमेलनाच्या पूर्वतयारीची नांदी

म. टा. प्रतिनिधी, मुंबई

अखिल भारतीय मराठी नाट्य परिषदेचे ९८वे अखिल भारतीय मराठी नाट्य संमेलन मुंबईत मुलुंड येथे होणार आहे. १३ ते १५ जून या कालावधीत पार पडणारे हे संमेलन, नाट्य परिषदेच्या मुलुंड शाखेच्या संयुक्त विद्यमाने महाकवी कालिदास नाट्यसंकुल परिसरात होणार आहे. नाट्य संमेलनाचे कामकाज सुरळीत व्हावे यासाठी स्थानिक पातळीवर विशेष कार्यालय मुलुंड येथे नियामक मंडळाकडून सुरू करण्यात आले आहे.

रविवारी, संमेलनाच्या कार्यालयाचे उद्घाटन राज्याचे सांस्कृतिक मंत्री आणि नाट्यसंमेलनाचे स्वागताध्यक्ष विनोद तावडे आणि लोकसभा सदस्य किरीट सोमय्या यांच्या हस्ते करण्यात आले. यावेळी नाट्य परिषदेचे अध्यक्ष प्रसाद कांबळी यांच्यासह अभिनेते शरद पोंक्षे, मधुरा वेलणकर, राजन भिसे, सविता मालपेकर, दिगंबर प्रभू तसेच अनेक रंगकर्मी, नाट्यरसिक उपस्थित होते. तावडे यांनी सर्व नियामक मंडळ आणि रंगकर्मींना शुभेच्छा दिल्या आहेत.

'आज खऱ्या अर्थाने ९८व्या अखिल भारतीय मराठी नाट्य संमेलनाच्या तयारीची नांदी झाली असे म्हणता येईल. आज नाट्य परिषदेच्या नियामक मंडळाची बैठक झाली असून त्यात संमेलनाच्या तयारीबाबत सखोल चर्चा झाली आहे. संपूर्ण नाट्यसृष्टी एकत्र येऊन यंदाचे नाट्यसंमेलन यशस्वीरीत्या पार पाडणार आहे. रविवारी मुलुंड विभागात कार्यालय सुरू करण्यात आले असून तयारीच्या कामाला आता अधिक जोर येईल', अशी प्रतिक्रिया नाट्य परिषद अध्यक्ष प्रसाद कांबळी यांनी 'मटा'शी बोलताना व्यक्त केली.