बाळासाहेब ठाकरेंच्या स्मारकाला अखेर मंजुरी

मटा ऑनलाइन वृत्त। मुंबई

शिवसेना प्रमुख दिवंगत बाळासाहेब ठाकरे यांचे बहुचर्चित स्मारक दादरमधील महापौर बंगल्यात उभारण्यासाठीच्या प्रस्तावाला मुंबई महापालिकेची मंजुरी मिळाली आहे. महापालिकेच्या सभागृहात बहुमताने याबाबतचा प्रस्ताव मंजूर करण्यात आला. महापालिका निवडणुकीची आचारसंहिता लागू झाल्यामुळे हा प्रस्ताव प्रलंबित होता. मात्र आज झालेल्या बैठकीत शिवसेनेने हा प्रस्ताव तातडीने मंजूर करून घेतला.

महापालिका निवडणुकीची आचारसंहिता लागू होण्याच्या काही दिवस अगोदर पालिका प्रशासनाने महापौर बंगल्याचा भूखंड बाळासाहेब ठाकरे राष्ट्रीय स्मारक सार्वजनिक न्यासाला हस्तांतरित करण्याचा प्रस्ताव सुधार समितीच्या बैठकीत सादर केला होता. भाजपचे नगरसेवक आणि सुधार समितीचे अध्यक्ष प्रकाश गंगाधरे यांनी त्यावेळी हा प्रस्ताव मंजूर केला. मात्र त्यानंतर लगेचच आचारसंहिता लागू झाली आणि हा प्रस्ताव रखडला. याच कारणामुळे सत्ताधारी शिवसेनेला पालिका सभागृहात हा प्रस्ताव मंजूर करता आला नव्हता.

सध्याच्या महापालिका सभागृहाची मुदत येत्या ७ मार्चला संपुष्टात येत आहे. त्यामुळे याच सभागृहाच्या कार्यकाळात हा प्रस्ताव मंजूर व्हावा यासाठी शिवसेना प्रयत्नशील होती. त्यानुसार आजच्या बैठकीत शिवसेनेने हा प्रस्ताव मंजूर करुन घेतला.

दरम्यान, शिवसेना प्रमुख दिवगंत बाळासाहेब ठाकरे यांचे स्मारक महापौर बंगल्यात करण्याला मनसेचा विरोध आहे. महापौर बंगल्यावर शिवसेनेचा डोळा आहे असा आरोप राज ठाकरे यांनी यापूर्वीच केला आहे. मात्र आता बदललेल्या राजकीय समिकरणांच्या पार्श्वभूमीवर या मंजुरीला मनसे विरोध करणार का, हा प्रश्न आहे.