अद्ययावत सुविधा, वाद्यांचा कलाकारांना पर्याय
म. टा. प्रतिनिधी, ठाणे
परदेशातील विविध भागांतून मागविलेली सुरेल वाद्य, अद्ययावत साधनांनीयुक्त रेकॉर्डिंग खोल्या, एन्डी मुंड्रो या परदेशी तज्ज्ञाने रेखाटलेले डिझाइन... परदेशी संकल्पनेवर आधारित सुसज्ज असा साऊंड रेकॉर्डिंगचा पर्याय संगीतप्रेमींसाठी खुला केला आहे. जिमी थॉमस या तरुणाने ठाण्यातील घोडबंदर रोड येथे ब्लू कॅसल स्टुडिओची निर्मिती करत शहरातील कलाकारांना सरावासह रेकॉर्डिंगसाठीही हक्काची जागा निर्माण करून दिली आहे.
लेखकाचे भावपूर्ण शब्द, त्याला सांधणारी एखादी चाल, काही संगीतकारांनी त्याला दिलेली वाद्यांची साथ आणि ते शब्द रसिकांपर्यंत पोहोचविणारे गायकाचे स्वर... एखाद्या नव्या कलाकृतीचा हा प्रवास सध्या अनेक नवोदित कलाकार पूर्ण करत असले तरी नव्या गीताचे रेकॉर्डिंग हे त्या प्रवासाचे ध्येय मानले जाते. अशावेळी सुसज्ज अशा साऊंड रेकॉर्डिंग स्टुडिओसाठी मुंबईची वाट धरावी लागत असल्याची तक्रारही अनेक कलाकारांकडून केली जाते. मात्र अशा कलाकारांना दिलासा देण्यासाठी ठाण्यातील घोडबंदर रोड येथे ब्लू कॅसल स्टुडिओचा अद्ययावत पर्याय जिमी थॉमस यांनी दिला आहे. बीकॉमचे शिक्षण पूर्ण करतानाच त्याने ज्येष्ठ गायक उस्ताद गुलाम मुस्तफा खा यांच्याकडे संगीताचे धडे गिरविले. त्यानंतर संगीत याच क्षेत्रात करिअर करण्याचा निर्णय घेतला असला तरी गायन, वादन यांपेक्षाही चौकटीबाहेरील पर्याय निवडत त्याने साऊंड रेकॉर्डिंग या क्षेत्राची निवड केली. संगीतकार ए आर रेहमान यांच्या चेन्नई येथील इन्स्टिट्यूटमध्ये या विषयाचे शिक्षण पूर्ण केल्यानंतर ठाणेकरांची गरज ओळखून त्याने मुंबईपेक्षा ठाण्यात साऊंड रेकॉर्डिंग स्टुडिओ उभारण्याची धडपड सुरू केली. मात्र पठडीतील स्टुडिओ न उभारता अनेकविध कल्पनांचा वापर या स्टुडिओत करण्यात आला आहे.
गायन, वादन अशा सर्व प्रकारचे रेकॉर्डिंग कलाकारांना करता येणार असून रेकॉर्डिंगसाठीही अद्ययावत यंत्रणेचा वापर करण्यात आला आहे. त्याशिवाय कलाकारांना सराव करण्यासाठीही हक्काची जागा स्टुडिओमध्ये निर्माण करण्यात आली आहे. यामध्ये असलेली वाद्यही परदेशातील विविध शहरांमधून मागविण्यात आली असून ड्रम्स, गिटार यांसारखी वाद्यांचा वापर करण्याची मुभाही कलाकारांना देण्यात आली आहे.
कोणत्याही भाषेतील संगीतक्षेत्रात काम करणाऱ्या कलाकारांना या स्टुडिओचा वापर करता येत असून मुंबईची वारी न करता ठाण्यात पर्याय उपलब्ध करण्याचा प्रयत्न आहे. अद्ययावत साधनांच्या वापरामुळे कलाकारांच्या कलाकृतीला न्याय देण्याचा प्रयत्न केला जात आहे.
जिमी थॉमस