म. टा. खास प्रतिनिधी, मुंबई
राज्य सरकारने लॉकडाउनचे नियम सोमवारपासून थोडे शिथिल केल्याने सरकारी तसेच खासगी कार्यालये १० टक्के उपस्थितीने सुरू झाली. त्यामुळे दक्षिण मुंबईत सकाळी नऊ वाजल्यापासूनच रेलचेल सुरू झाली.
आर्थिक व्यवहारांसाठी कार्यालयांतील कर्मचारी बँकांमध्ये जाण्यासाठी बाहेर पडले. बरेच दिवसांनी कार्यालये उघडल्याने साफसफाई करण्यासाठी साहित्य खरेदी करण्यासही लोकांनी गर्दी केली होती. मोहम्मद अली रोड, क्रॉफर्ट मार्केटच्या आजूबाजूचा परिसर, लोहार चाळ यासारख्या प्रमुख बाजारांमधील काही दुकाने उघडल्याने येथेही गर्दी दिसली.
दक्षिण मुंबईत ग्रँट रोड, चर्नी रोड, मरिन लाइन्स, चर्चगेट, कुलाबा, फोर्ट, छत्रपती शिवाजी महाराज टर्मिनस, मशीद बंदर या परिसरात कार्यालये आणि व्यावसायिक गाळे असलेल्या इमारतींची संख्या अधिक आहे. निवासी वसाहतींचे प्रमाण तुलनेने कमी आहे. लॉकडाउनमुळे हा परिसर बऱ्यापैकी बंद होता. या परिसरातील श्रमिक, स्टॉलधारक गावी गेल्याने रस्त्यावरही फारशी गर्दी दिसत नव्हती. परिणामी मुंबईच्या इतर विभागांच्या तुलनेत दक्षिण मुंबईतील ए, बी, सी, डी या विभागात करोनारुग्णांची संख्या कमी आहे. मात्र आता हा परिसर गजबजू लागल्याने करोनाचा संसर्ग वाढण्याचा धोका अधिक असल्याचे येथील नागरिकांनी म्हटले आहे.