म. टा. खास प्रतिनिधी, मुंबई
शरद पवार ईडी कार्यालयात येणार असल्याने दक्षिण मुंबईत पोलिसांनी कडक बंदोबस्त ठेवण्यात आला होता. कार्यकर्त्यांच्या हालचाली टिपण्यासाठी मुंबई पोलिसांच्या वतीने प्रथमच यावेळी ड्रोनचा वापर करण्यात आला. विशेष म्हणजे या ड्रोनमधून पोलिस उद्घोषणा करत असल्याने या ड्रोनने सर्वांचेच लक्ष वेधून घेतले होते.
दक्षिण मुंबईतील कुलाबा, कफ परेड, मरिन ड्राइव्ह, आझाद मैदान, डोंगरी, जे. जे. मार्ग, एमआरए मार्ग या सात पोलिस ठाण्यांच्या हद्दीत शुक्रवारी जमावबंदीचे आदेश जारी करण्यात आले होते. तरीही राष्ट्रीवादी काँग्रेसचे नेते आणि कार्यकर्ते ईडी कार्यालयाजवळ येण्यावर ठाम होते. गनिमी कावा करीत दाखल व्हा, असे नेत्यांनीही कार्यकर्त्यांना सांगितले होते. त्यामुळे या परिसरात मोठ्या प्रमाणात कार्यकर्ते जमा हे निश्चित असल्याने मुंबई पोलिसांनी जय्यत तयारी केली होती. ईडी कार्यालयाकडे जाणारे सर्व रस्ते बॅरिकेड्स लावून बंद करण्यात आले होते. ईडी कार्यालयानजीक राष्ट्रवादी काँग्रेसचे प्रदेश कार्यालय आहे. या ठिकाणीही पोलिस बंदोबस्त लावण्यात आला होता. मुंबई तसेच मुंबईबाहेरून येणारे शेकडो कार्यकर्ते प्रदेश कार्यालयाजवळ जमा होऊ लागले. घोषणाबाजी, आंदोलन सुरू करण्यात आले. कार्यकर्त्यांच्या या सर्व हालचालींवर पोलिस ड्रोनमधून नजर ठेवून होते. या परिसरात जमावबंदी लागू करण्यात आली असून एकत्र जमा होऊ नका. तसे आढळल्यास कायदेशीर कारवाई केली जाईल, अशी उद्घोषणा या ड्रोनमधून केली जात होती. ड्रोनमधून होणारी उद्घोषणा ऐकून सर्वच अवाक झाले. याआधी अनंत चतुर्दशीला विसर्जनादरम्यान मुंबई पोलिसांच्या वतीने ड्रोनचा वापर करण्यात आला होता. हे ड्रोन अत्याधुनिक असून यामधून मिळणाऱ्या फोटो आणि व्हिडीओ उत्तम दर्जाचे आहेत. पोलिसांना हे ड्रोन चालविण्याचे प्रशिक्षण देण्यात आल्याची माहिती एका अधिकाऱ्याने दिली.