...मग फटाके काय व्हॉट्सअॅपवर फोडायचे?: राज

मटा ऑनलाइन वृत्त। मुंबई

महाराष्ट्र नवनिर्माण सेनेचे अध्यक्ष राज ठाकरे यांनीही फटाकेबंदीच्या वादात उडी घेतली आहे. हिंदूंच्या सणावरच बंदी कशासाठी, असे विचारत 'आता फटाके काय फक्त व्हॉट्सअॅपवरच फोडायचे का', असा सवालही राज ठाकरे यांनी उपस्थित केला आहे. फटाकेबंदीला आपला विरोध असून दिवाळीचा सण जसा साजरा केला जातो तसाच आताही लोकांनी तो करावा अशी भूमिकाही राज ठाकरे यांनी मांडली आहे.

फटाक्यांमुळे त्रास होतो हे जरी मान्य असले, तरी मग सण साजरे का करायचे, असा सवालही राज ठाकरे यांनी उपस्थित केला. फटाक्यांवर बंदी आणायची असेल तर मग मग सर्वच सणांवर बंदी आणा असा उपरोधिक टोलाही राज ठाकरेंनी लगावला आहे. सणानिमित्त दिल्या जाणाऱ्या सुट्ट्याही आता रद्द करा असे सूचवून राज यांनी फटाकेबंदीच्या मुद्द्याबाबत नापसंती दर्शवली.

दरम्यान, फटाकेबंदीवर शिवसेनेतही दोन मतं असल्याचं स्पष्ट होत आहे. शिवसेनेचे खासदार संजय राऊत यांनी फटाकेबंदीवर आक्षेप नोंदवला आहे. फटाक्यांवर अनेकांचा रोजगार अवलंबून आहे. फटाके केवळ भारतातच नव्हे, तर जगभरात फोडले जातात याकडेही राऊत यांनी लक्ष वेधलंय. फटाकेविक्रीवर बंदी घालू नये असा सल्लाही राऊत यांनी सरकारला दिला आहे. मात्र दुसरीकडे राज्य सरकारमध्ये पर्यावरणमंत्री असलेले शिवसेनेचे रामदास कदम यांनी मात्र वेगळी भूमिका घेतली आहे. फटाकेविक्रीबाबत मुख्यमंत्री देवेंद्र फडणवीस यांच्याशी चर्चाकरून अंतिम निर्णय घेण्यात येईल असे कदम यांनी स्पष्ट केले आहे.

दरम्यान, राज्यभरात दिवाळीची जय्यत तयारी सुरू झाली आहे. या पार्श्वभूमीवर राज्यभरातील शाळांमध्ये विद्यार्थ्यांना 'आम्ही प्रदूषणमुक्त दिवाळी साजरी करू' अशी शपथही देण्यात आली आहे. मंत्रालय परिसरात मुख्यमंत्री देवेंद्र फडणवीस, शिक्षणमंत्री विनोद तावडे आणि पर्यावरणमंत्री रामदास कदम यांच्या उपस्थितीत देखील विद्यार्थ्यांना शपथ देण्यात आली आहे.