आज तिन्ही मार्गांवर मेगाब्लॉक नाही

मुंबई

आज अनंत चतुर्दशीदिनी सार्वजनिक गणेशोत्सव मंडळाच्या विसर्जन मिरवणुकांसाठी होणारी मोठी गर्दी लक्षात घेत रेल्वे प्रशासनाने उद्याचा मेगाब्लॉक रद्द केला आहे. यामुळे मध्य, हार्बर आणि पश्चिम रेल्वेच्या प्रवाशांना मोठा दिलासा मिळाला आहे.

दहा दिवसांच्या सार्वजनिक मंडळांच्या महाकाय आकर्षक गणेशमूर्तींच्या विसर्जन मिरवणुकांमधील गणेशाचे मनोहारी रूप पाहण्यासाठी मुंबई, तसेच मुंबईबाहेरूनही असंख्य लोक मुंबईत येतात. या मिरवणुका पाहण्यासाठी मुंबईतील प्रमुख मार्गांवर दुतर्फा भाविकांची गर्दी उसळते. यामुळे येणाऱ्या-जाणाऱ्या प्रवाशांची गैरसोय टाळता यावी यासाठी तिन्ही मार्गांवरील मेगाब्लॉक रद्द करण्यात आला आहे.

मध्यरात्री विशेष लोकल

विसर्जनानंतर मुंबईतील विविध चौपाट्यांवर गेलेल्या भाविकांना रात्री उशिरा घरी परतता यावे यासाठी अनंत चतुर्दशीच्या मध्यरात्री मध्य रेल्वेने छत्रपती शिवाजी महाराज टर्मिनस ते पनवेल, सीएसएमटी ते कल्याण आणि पश्चिम रेल्वेच्या चर्चगेट ते विरार या मार्गावर विशेष लोकल चालवण्याचा निर्णय घेतला आहे.

चर्नी रोड स्थानकात बदल

गर्दी टाळण्यासाठी आज संध्याकाळी ५ ते रात्री १० वाजेपर्यंत चर्नी रोड स्थानकात अप मार्गावरील धिम्या लोकलचा थांबा रद्द करण्यात आला आहे. प्रवाशांच्या सोयीसाठी साडे पाच ते साडे आठ वाजेपर्यंत सर्व अप जलद लोकल मुंबई सेंट्रल ते चर्चगेट स्थानकांदरम्यान थांबव्यात येणार आहेत.