हे यश दोघींचे

माधवी योगेश डोंगरकर

MADHVI YOGESH DONGARKAR

९२.२० टक्के

म. टा वृत्तसेवा, डोंबिवली

दोन वर्षांपूर्वी वडील कामासाठी घराबाहेर पडले, ते परतलेच नाहीत. आईच कुटुंबाची 'कर्ती' झाली. चार घरांमध्ये लादी पुसण्याचे काम हाती घेतले. रिक्षा दूरच, बससाठीचेही पैसे वाचवण्यासाठी रोज साडेपाच किमी अंतर पायी चालत जाऊ लागली, पुन्हा परतीचा तेवढाच प्रवास. आईकडूनच ही जिद्द लेकीनेही घेतली. अभ्यासाचा ध्यास घेतला. सर्व आवडी दूर सारून दिवस-रात्र पुस्तक हाती घेतले आणि आज माधवी डोंगरकर हिने दहावीत ९२.२० टक्के गुण मिळवले आहेत. पण हे यश केवळ माधवीचेच नाही, तर तिच्यात जिद्द भरणाऱ्या तिच्या आईचेही आहे.

माधवीने शिक्षणासाठी अफाट मेहनत केली. आईला लादी पुसून मिळणाऱ्या चार हजार रु.च्या कमाईवर घरभाडे भरून दोन वेळचे जेवण मिळणेही आव्हानच. पण माधवीने अभ्यासात झोकून दिले. रात्रीची पाच तासांची झोप वगळून इतर सर्व वेळ तिने अभ्यासाला दिला. कल्याण-शिळ मार्गालगत मानपाडा रोडवरील सोनारपाडा परिसरातील साई प्रसाद इमारतीच्या गच्चीवर पत्र्याची शेड टाकून तयार केलेल्या दोन खोल्यांच्या भाड्याच्या घरात माधवी आईसोबत राहते. तिने दहावीला ९० टक्क्यांहून अधिक गुण मिळविण्याचे उद्दिष्ट ठेवले. नववीत ८९ गुण मिळाल्यानंतर तिने दहावीत ९० टक्के गाठण्याची जिद्द बाळगली. सकाळी ६पासून दिवस सुरू होताच रात्री १२पर्यंत कधी घरी, शाळेत तसेच शिक्षिकेच्या घरी अभ्यास करून माधवीने आपले ध्येय पूर्ण केले. तिने पुढच्या शिक्षणाचेही असेच उद्दिष्ट समोर ठेवले आहे. (सीए व्हायचे स्वप्न...२)