त्या जवानांविरुद्ध लैंगिक अत्याचाराचा आरोप

कोठडी मृत्यूप्रकरणी सीबीआयची उच्च न्यायालयात माहिती

म. टा. विशेष प्रतिनिधी, मुंबई

वडाळा येथे दोन वर्षांपूर्वी अॅग्नेलो वल्दारीस या मुलाच्या कोठडी मृत्यूच्या प्रकरणात जीआरपीच्या दहा जवानांविरुद्ध अनैसर्गिक लैंगिक अत्याचाराचा आरोप ठेवण्यात येणार असल्याची माहिती सीबीआयतर्फे बुधवारी मुंबई उच्च न्यायालयात देण्यात आली.

या पोलिसांविरुद्ध सीबीआय विशेष न्यायालयात यापूर्वीच आरोपपत्र दाखल करण्यात आले आहे. त्यात भारतीय दंड संहितेच्या कलम ३७७ (अनैसर्गिक लैंगिक अत्याचार) अन्वयेही आरोप ठेवण्यात येतील. मात्र, या पोलिसांविरुद्ध खुनाचा (कलम ३०२) आरोप लावण्याइतपत पुरावे नसल्याचे तपासाअंती अंतिमतः स्पष्ट झाले आहे, असे सीबीआयतर्फे अॅड. हितेन वेणेगावकर यांनी न्या. रणजित मोरे यांच्या नेतृत्वाखालील खंडपीठाला सांगितले. त्याचवेळी या पोलिसांवर खुनाचा आरोप ठेवणे आवश्यक असून तसे पुरावे समोर आले असल्याचे पीडित मुलाच्या वडिलांतर्फे वकिलांनी सांगितले. त्यामुळे त्याविषयीच्या युक्तिवादासाठी खंडपीठाने पुढची सुनावणी ४ सप्टेंबरला ठेवली.

अॅग्नेलो व त्याचे काही मित्र चोरीच्या आरोपाखाली वडाळा रेल्वे पोलिसांच्या लॉकअपमध्ये असताना अॅग्नेलोचा पोलिस अत्याचारात मृत्यू झाला होता. नंतर त्याचे वडील लिओनार्ड वल्दारीस यांनी याचिका केली. त्यावरील सुनावणीनंतर उच्च न्यायालयाने सीबीआय तपासाचे आदेश दिले होते. त्यानुसार सीबीआयने तपासाअंती संबंधित दहा पोलिसांविरुद्ध न्यायालयात आरोपपत्र दाखल केले.