मुंबईतील वर्सोवा बीचवर तिघे बुडाले

मटा ऑनलाइन वृत्त । मुंबई

मुंबईच्या पश्चिम उपनगरातील वर्सोवा बीचवर तीन मुलं बुडाल्याचं वृत्त आहे. तिघांपैकी एकाचा मृतदेह हाती लागला असून अन्य दोघांचा शोध सुरू आहे.

मिळालेल्या माहितीनुसार, वर्सोवा बीचवर दगडांच्या आडोशाला बसून आज दुपारी पाच मुलं दारू पीत असल्याचं ड्युटीवर असलेल्या जीवरक्षकांना आढळून आलं. जीवरक्षकांनी त्यांना तात्काळ तिथून हुसकावून लावलं. मात्र, जीवरक्षक गस्तीसाठी दुसरीकडं गेल्यानंतर पुन्हा ती मुलं तिथं आली. दारूच्या नशेतच ही मुलं पाण्यात उतरली. पाण्याचा अंदाज न आल्यानं यापैकी तिघं बुडाली. बुडालेल्यांपैकी एकाला बाहेर काढण्यात यश आलं. त्याला तातडीनं कूपर रुग्णालयात हलवण्यात आलं. मात्र, तिथं पोहोचण्याआधीच त्याचा मृत्यू झाला. नौदलाच्या बचाव पथकाचे जवान इतर दोघांचा शोध घेत आहेत.