'जसलोक'मधील २१ कर्मचारी बाधित

म. टा. विशेष प्रतिनिधी, मुंबई

जसलोक रुग्णालयातील २१ कर्मचाऱ्यांना करोनाची लागण झाल्याची माहिती रुग्णालय प्रशासनाने मंगळवारी दिली. रुग्णालयामधील केवळ एक परिचारिका संसर्ग झालेल्या रुग्णाच्या संपर्कात आली असून, इतर कुणाही वैद्यकीय कर्मचाऱ्याला वा परिचारिकेला कोविडची लागण झालेली नाही, हा रुग्णालय प्रशासनाचा दावा साफ खोटा ठरला आहे. 'मटा'ने यासंदर्भात मंगळवार, ७ एप्रिलच्या अंकात बातमी प्रसिद्ध केली होती.

संसर्ग झालेल्या परिचारिकांना रातोरात सेव्हन हिल्स रुग्णालयामध्ये विलगीकरण कक्षामध्ये ठेवण्यात आले. तसेच कस्तुरबा रुग्णालयामध्ये त्यांच्या करोनासाठी तपासण्याही करण्यात आल्या. यानंतर मंगळवारी जसलोकने रुग्णालयातील २१ वैद्यकीय कर्मचाऱ्यांना करोनाची लागण झाल्याचे स्पष्ट केले आहे. रुग्णालय प्रशासनाने दिलेल्या माहितीनुसार, ९८४ कर्मचाऱ्यांची वैद्यकीय तपासणी करण्यात आली. त्यापैकी २१ जणांना करोनाचा संसर्ग झाला आहे. त्यामध्ये परिचारिकांचाही समावेश आहे. यातील १६ जणांना सेव्हन हिल्स रुग्णालयामध्ये पाठवण्यात आले आहे.