निम्म्या दुकानांची मराठी पाटी कोरीच; ४८ टक्केच दुकानदारांचा प्रतिसाद

मुंबई : महापालिकेने दुकाने, आस्थापनांवरील मराठी पाट्यांसाठी दिलेली तीन महिन्यांची मुदत दोन दिवसांतच म्हणजे ३० सप्टेंबरला संपुष्टात येत आहे. तरीही याबाबतच्या अंमलबजावणीला ५० टक्केही प्रतिसाद मिळालेला नाही. मुंबईतील सुमारे पाच लाख दुकानांपैकी केवळ ४८ टक्के दुकानांवरच मराठी पाट्या झळकल्या आहेत. त्यामुळे उर्वरित अडीच लाख दुकांनावर या पाट्या कधी लागणार, याकडे लक्ष लागले आहे.

मुंबई महापालिकेने मराठी पाट्यांसंदर्भात केलेल्या पाहणीत अडीच लाखांपेक्षाही कमी दुकानांनी मराठी पाट्यांची अंमलबजावणी केल्याचे आढळून आले. त्यामुळे, मुंबई पालिकेने त्याची गंभीर दखल घेतली असून मराठी पाट्यांच्या निर्णयाची अंमलबजावणी न करणाऱ्या दुकाने, आस्थापनांवर कारवाई केली जाणार असल्याचे स्पष्ट केले आहे. मुंबई पालिकेने दुकाने, आस्थापनांवर मराठी पाट्या बंधनकारक केल्या आहेत. याबाबत पूर्तता करण्यासाठी यापूर्वी ३० जूनची मुदत देण्यात आली होती. त्यावेळी व्यापारी संघटनांनी मुदतवाढीची विनंती केली. यानुसार ३० सप्टेंबरपर्यंत मुदतवाढ देण्यात आली.

मराठी पाट्यांसाठी तीन महिन्यांची मुदतवाढ मिळाल्यानंतरही केवळ ४८ टक्के दुकानदारांनी मराठी पाट्यांची अंमलबजावणी केल्याचे स्पष्ट झाले. त्यामुळे, उर्वरित दोन दिवसांच्या कालावधीत या निर्णयाची अंमलबजावणी न झाल्यास कारवाईचे सत्र सुरू होणार आहे. सुरुवातीच्या कालावधीत व्यापारी संघटनांनी मराठी पाट्या रंगविण्यासाठी कारागीर, रंगारी न मिळणे, त्यासाठीचा कच्चा माल महाग असणे, अशी कारणे पुढे केली होती. त्यानंतर वरिष्ठ पातळीवरील बैठकांमध्ये पालिकेने व्यापारी संघटनांना तीन महिन्यांची मुदतवाढ दिली. परंतु, या कालावधीतही सगळ्या दुकानदारांनी त्याचे पालन न केल्याचे स्पष्ट झाल्याने पालिकेकडून कठोर कारवाई केली जाणार आहे.