कारवाईबद्दल ‘टू बी ऑर नॉट टू बी’

'प्रबोधनकार'मध्ये हॅम्लेट नाटकाला सलग तारखा दिल्याचा वाद

कल्पेशराज कुबल, साठ्ये कॉलेज

प्रबोधनकार ठाकरे नाट्यगृहाचे व्यवस्थापन, महापालिका उपायुक्त आणि कॉपोरेट कंपनी यांच्यातील हातमिळवणीमुळे 'हॅम्लेट' या नाटकाला सलग तारखा दिल्याचा वाद आता आणखी चिघळला आहे. शनिवार, १२ मे ही तारीख अन्य निर्मात्यांना द्यावी, याबाबतच्या महापौरांच्या आदेशाला केराची टोपली दाखवत, नाट्यगृहाच्या व्यवस्थापनाने शनिवारी या नाटकाचा प्रयोग होऊ दिल्याने मराठी व्यावसायिक नाट्यनिर्माता संघाने तीव्र आक्षेप घेतला आहे. नाट्यगृह व्यवस्थापक राजश्री पाटील, पालिका उपायुक्त डॉ. किशोर क्षीरसागर यांच्यावर त्वरीत कारवाई करण्याची मागणी निर्मात्यांनी केली आहे. ही कारवाई होणार की त्यांना पाठीशी घालून पालिका 'टू बी ऑर नॉट टू बी' भूमिका निभावणार, असा सवाल नाट्य निर्माता संघाने केला आहे.

गेल्या आठवड्यात शुक्रवार ते रविवार असे सलग तीन दिवस 'हॅम्लेट' या नाटकासाठी बोरिवली येथील प्रबोधनकार ठाकरे नाट्यगृह मंजूर करण्यात आले होते. या तारखावाटपात नियमभंग होत असल्याचा दावा करत मराठी व्यावसायिक नाट्यनिर्माता संघाने आक्षेप नोंदवला होता. संघांने महापौर विश्वनाथ महाडेश्वर यांच्याकडेही धाव घेतली. महापौरांनी याची दखल घेत 'पालिकेच्या नियमांचे उल्लंघन झाले असून शनिवार, १२ मे ही तारीख 'हॅम्लेट'ऐवजी इतर निर्मात्यांना द्या,' अशा आदेशाचे पत्र उपायुक्तांना लिहिले. मात्र या पत्राकडे दुर्लक्ष करत नाट्यगृह व्यवस्थापनाने 'हॅम्लेट'चा प्रयोग होऊ दिले. हा नाट्यनिर्मात्यांवर अन्याय आहे, असे नाट्यनिर्माता संघाचे अध्यक्ष प्रसाद कांबळी यांनी सांगितले. रंगमंच कामगार संघ, कलाकार संघटना तसेच अखिल भारतीय नाट्यपरिषेदच्या नियामक मंडळाने निर्माता संघाला पाठिंबा दर्शविला आहे. 'या प्रकरणी संबंधित अधिकाऱ्यांना माहिती घेण्यास सांगितले असून त्यानंतर कारवाईचा निर्णय घेण्यात येईल,' असे पालिका आयुक्त अजय मेहता यांनी 'मटा'शी बोलताना सांगितले.

व्यवस्थापनाकडून उत्तर नाही!

सत्रवाटपाचा मुद्दा पालिकेकडे प्रलंबित असताना, नाट्यगृह व्यवस्थापनाने निर्माता संघाला विचारात न घेता परस्पर 'हॅम्लेट'च्या निर्मात्यांसोबत हातमिळवणी करत तारीख वाटप कशी केली, असा सवाल निर्माते संतोष काणेकर यांनी केला आहे. याबाबत व्यवस्थापिका पाटील यांच्याशी वारंवार संपर्क साधल्यानंतरही लेखी स्वरूपात कोणतेही उत्तर मिळाले नसल्याचे त्यांनी सांगितले.

मराठी नाट्यनिर्मात्यांवर अन्याय होऊ देणार नाही. नियमबाह्य पद्धतीने तारखावाटप झाले असल्यास, तसेच उपायुक्त डॉ. किशोर क्षीरसागर दोषी आढळल्यास त्यांच्यावर कारवाई केली जाईल.

- विश्वनाथ महाडेश्वर, महापौर

नाट्यनिर्माता संघाला अंधारात ठेवून, महापौरांच्या पत्राकडे दुर्लक्ष करून 'हॅम्लेट'चा शनिवारचा प्रयोग नाट्यगृह व्यवस्थापनाने होऊ दिला. नाट्यव्यवसायाच्या भविष्यासाठी ही 'धोक्याची घंटा' आहे. व्यवस्थापक पाटील, उपायुक्त क्षीरसागर यांच्यावर कारवाई व्हावी.

- प्रसाद कांबळी, अध्यक्ष नाट्यनिर्माता संघ