मुंबई-पुणे एक्सप्रेस वेवरचा टोलदर वाढणार

मटा ऑनलाइन वृत्त । मुंबई

मुंबई-पुणे द्रुतगती मार्गावरून प्रवास करणाऱ्यांना येत्या काही दिवसात टोलपोटी भुर्दंड बसणार आहे. १ एप्रिलपासून या मार्गावरचा टोल ३५ रुपयांनी वाढणार आहे. ही दरवाढ हलक्या वाहनांसाठी आहे. सध्याच्या १९५ रुपयांवरून आता टोलपोटी २३० रुपये मोजावे लागणार आहेत. दर ३ वर्षांनी १ एप्रिलपासून ही दरवाढ केली जाते.

यापूर्वीची दरवाढ १ एप्रिल २०१४ ला झाली होती. २००४ साली सार्वजनिक बांधकाम विभागाकडून ही टोलदरवाढीची अधिसूचना जारी करण्यात आली. त्यानुसार मुंबई-पुणे द्रुतगती मार्गावरील टोल दरात दर ३ वर्षांनी १८ टक्के वाढ करण्यात येते. टोलवसुली थांबवण्याची मागणी यापूर्वी अनेक सामाजिक कार्यकर्त्यांनी केली होती. राज्य सरकारने राज्यातले ५३ टोलनाके बंद केल्याचा दावा केला आहे. मात्र प्रत्यक्षात महत्त्वाच्या टोलनाक्यांवर वसुली सुरूच आहे.

मुंबई-पुणे द्रुतगती महामार्ग सरकारच्या मालकीचा आहे. मात्र रस्ते विकास महामंडळाने ९१८ कोटी रुपये स्वीकारून आयडीयल रोड बिल्डर्सला (आयआरबी) हा महामार्ग तयार करून २०१९ सालापर्यंत टोलवसुलीचे कंत्राट दिले. टोलपोटी २०१९ सालापर्यंत आयआरबीला २,८६९ कोटी रुपये मिळण्याची अपेक्षा होती. पण ती यापूर्वीच वसूल झाली आहे. टोलवसुलीची पूर्ण रक्कम वसूल झाल्यानंतरही ठेकेदारांच्या फायद्यासाठी हे कंत्राट रद्द केले जात नाही, असा सामाजिक कार्यकर्त्यांचा आरोप आहे. विशेष म्हणजे आधी विरोधक म्हणून टोलविरोधी भूमिका घेणाऱ्या शिवसेना-भाजपने सत्तेत आल्यावर आपल्या भूमिकेत सोयीस्कर बदल केला आहे. सरकारच्या आशीर्वादाने टोलवसुली सुरूच आहे.