मराठीत व्यवहार करा; मनसेने बँकांना ठणकावले

मटा ऑनलाइन वृत्त । मुंबई

मनसेचे पुढील आंदोलन हे बँकांमध्ये मराठीच्या आग्रहासाठी असेल, असा इशारा मनसे अध्यक्ष राज ठाकरे यांनी ठाण्यातील जाहीर सभेत दिल्यानंतर पक्षाचे कार्यकर्ते मराठीच्या मुद्द्यावरून आक्रमक झाले आहेत. बँकांमध्ये मराठी भाषेत व्यवहार करावेत, अन्यथा आंदोलन करू, असा इशारा देणारे पत्र आज पक्षाच्या कार्यकर्त्यांनी वांद्रे-कुर्ला संकुलातील बँकांच्या कार्यालयांमध्ये दिले आहे.

मराठी भाषेत व्यवहार सुरू करावेत, या मागणीचे पत्र पक्षाच्या कार्यकर्त्यांनी वांद्रे - कुर्ला संकुलातील पंजाब नॅशनल बँक, युनियन बँक आणि अलाहाबाद बँकेसह इतर बँकांच्या कार्यालयांमध्ये जाऊन दिले. मराठीत व्यवहार सुरू न केल्यास मनसे स्टाइलने आंदोलन करू, असा इशाराही दिला आहे.

मनसेचे पुढील आंदोलन हे बँकांमध्ये मराठी भाषेच्या आग्रहासाठी असेल, असा इशारा राज ठाकरे यांनी ठाण्यातील सभेत दिला होता. बँकांमध्ये स्थानिक भाषेतून व्यवहार व्हायला हवेत, असा आरबीआयचा नियम आहे. परंतु, आपल्याकडे सर्रास हिंदी आणि इंग्रजीतून व्यवहार होतात, असे ते म्हणाले होते.