म. टा. विशेष प्रतिनिधी, मुंबई
नायर रुग्णालयातील डॉ. पायल तडवी आत्महत्या प्रकरण ताजे असताना केईएम रुग्णालयातील २८ वर्षीय वरिष्ठ वैद्यकीय अधिकारी म्हणून कार्यरत असलेल्या डॉ. प्रणय जयस्वाल यांनी आत्महत्या केल्यामुळे वैद्यकीय क्षेत्रात खळबळ उडाली आहे. आत्महत्येमागील नेमके कारण अद्याप समजू शकलेले नाही, मात्र पोलिसांनी दिलेल्या माहितीनुसार मागील पाच ते सहा महिन्यांपासून ते वैफल्यग्रस्त होते व त्यासाठी त्यांच्यावर वैद्यकीय उपचारही सुरू होते. या प्रकरणी भोईवाडा पोलिसांनी अपमृत्यूची नोंद केली असून, तपास सुरू केला आहे.
मूळचे अमरावतीचे असलेल्या डॉ. प्रणय जयस्वाल यांनी विषारी इंजेक्शन घेऊन जीवन संपवले. घटनास्थळी कोणतीही सुसाईड नोट सापडली नसल्याची प्राथमिक माहिती आहे. केईएम रुग्णालयाचे अधिष्ठाता डॉ. हेमंत देशमुख यांनी या आत्महत्येच्या घटनेला दुजोरा दिला आहे. डॉ. जयस्वाल यांनी केईएम रुग्णालयातून पदवी परीक्षा उत्तीर्ण केली होती, रुग्णस्नेही व अतिशय हुशार डॉक्टर म्हणून त्यांची ओळख होती. शुक्रवारी रात्री आठ वाजल्यापासून त्यांचा फोन बंद होता. ते रुमवरही नव्हते. फोन बंद येत असल्याने त्यांच्या मित्रांनी शोधाशोध सुरू केली. शनिवारी सकाळी साडेदहा वाजण्याच्या सुमारास निवासी डॉक्टरांच्या वसतीगृहाच्या गच्चीवर डॉ. प्रणव यांचा मृतदेह आढळून आला. मृतदेहाजवळ इंजेक्शनही पोलिसांना सापडले.
डॉ. प्रणव यांच्या पालकांना यासंदर्भात कळवले असून ते रात्री उशिरा मुंबईत पोहचणार असल्याचे पोलिसांनी सांगितले. वैयक्तिक कारणामुळे त्यांनी आत्महत्या केल्याची प्राथमिक शक्यता पोलिसांनी वर्तवली आहे.