पत्नीचा अपघाती मृत्यू; पतीला मिळाले १ कोटी

मटा ऑनलाइन वृत्त । मुंबई

ट्रकच्या धडकेत पत्नीचा मृत्यू झाल्यानंतर आर्थिकदृष्ट्या तिच्यावर अवलंबून असलेल्या बेरोजगार पतीला विम्यांतर्गत एक कोटी रुपये नुकसान भरपाई देण्याचा आदेश मोटार अपघात दावा प्राधिकरणने विमा कंपनीला दिला आहे.

मुंबईतील अंधेरी परिसरात राहणाऱ्या अनाघा नावाच्या महिलेचा २००८ साली अंधेरी पुलाजवळ ट्रकच्या धडकेत मृत्यू झाला होता. त्यावेळी तिचा पती विवेक (वय २६) हा बेरोजगार होता. घरात पत्नी ही एकटीच कमावती सदस्य होती असा दावा विवेकने केला होता व नुकसान भरपाई मिळवण्यासाठी कोर्टात धाव घेतली होती. हा अपघात ट्रक चालक बाबूराव अग्रवालच्या चुकीमुळे झाला होता. त्याने अनाघाच्या मोटारसायकलला धडक दिल्यानंतर तिचा हॉस्पिटलमध्ये पोहोचण्याआधीच मृत्यू झाला होता हे तपासाअंती सिद्ध झाले होते.

विवेकने केलेली तक्रार खोटी असल्याचे सांगून 'गाडी मालक आणि न्यू इंडिया विमा लिमिटेड कंपनी'ने विवेकची तक्रार फेटाळून लावली होती. परंतु मोटार अपघात दावा प्राधिकरणाने विवेकशी सविस्तर चर्चा केली. पोलिसांनी अपघाताचा केलेला तपास, याप्रकरणाची कागदपत्रे तपासल्यानंतर महिलेचा मृत्यू हा ट्रकच्या धडकेमुळेच झाल्याचे स्पष्ट झाल्याने प्राधिकरणाने विवेकच्या बाजुने निर्णय दिला. अनाघा या एका कंपनीत मॅनेजर पदावर कार्यरत होत्या. त्यांची वर्षभराची कमाई ही ३५ ते ४० लाख रुपये इतकी होती. पतीचे पत्नीवर अवलंबून असणे तसेच पतीची बेरोजगारी या दोन मुद्यांवर प्राधिकरणाने विमा कंपनीने विवेकला १ कोटी रुपये नुकसान भरपाई द्यावी, असा आदेश दिला.