विनायक मेटेंच्या कारनं धडक दिलेला ट्रक पालघरचा; महत्त्वाची माहिती समोर

मुंबई: शिवसंग्राम पक्षाचे संस्थापक अध्यक्ष विनायक मेटेंचा आज पहाटे अपघाती मृत्यू झाला. मुंबई-पुणे एक्स्प्रेस वेवर मेटे यांच्या कारला भीषण अपघात झाला. त्यात गंभीर जखमी झालेल्या मेटेंचा म़ृत्यू झाला. विनायक मेटे यांच्या अपघातास कारणीभूत असलेला ट्रक पालघरमधील असल्याची माहिती समोर आली आहे. या ट्रकचा आणि ट्रक चालकाचा शोध सध्या सुरू आहे.

विनायक मेटेंच्या फोर्ड एन्डेवेर कारला आयशर कंपनीच्या ट्रकनं धडक दिली. DN 09 P 9404 असा या ट्रकचा नंबर असून तो पालघरमधील कासा येथील एका व्यक्तीच्या मालकीचा आहे. विनायक मेटे यांच्या कारला अपघात झाल्यानंतर ट्रकचा चालक ट्रक घेऊन फरार झाला. सध्या पालघर आणि रायगड पोलिस ट्रक आणि ट्रक चालकाचा शोध घेण्यासाठी वापी दमण भागात रवाना झाले आहेत. उमेश यादव असं या ट्रक चालकाचं नाव असल्याचं उघड झालं असून त्याची ओळख पटवण्यासाठी ट्रक मालकाला ताब्यात घेण्यात आलं आहे.
मेटेंच्या कारसारखीच कार कोल्हापुरात ४०० फूट दरीत कोसळली होती; तेव्हा चमत्कार घडला होता
उद्या बीडमध्ये अंत्यसंस्कार
विनायक मेटे यांच्या अपघाती निधनामुळे शिवसंग्रामच्या कार्यकर्त्यांसह बीड जिल्ह्यावर शोककळा पसरली आहे. आज संध्याकाळपर्यंत विनायकराव मेटे यांचं पार्थिव बीड येथे त्यांच्या घरी नेण्यात येणार आहे. उद्या सकाळपासून दुपारी बारा वाजेपर्यंत शिवसंग्राम भवन या ठिकाणी मेटे यांचं पार्थिव अंत्यदर्शनासाठी आणण्यात येणार आहे, अशी माहिती शिवसंग्राम कार्यालयाकडून मिळाली आहे.
विनायक मेटेंच्या अपघाती निधनानंतर पत्नीची प्रकृती बिघडली; उपचार सुरू
दुपारी तीन वाजेपर्यंत विनायक मेटे यांच्या पार्थिवावर अंत्यसंस्कार करण्यात येणार आहेत. दिवंगत नेते गोपीनाथ मुंडे यांच्यानंतर बीड जिल्ह्याला पुन्हा एकदा मोठा धक्का बसला आहे. बीडमधील अजून एक दर्दी नेता हरपल्याने जिल्ह्यावर शोककळा पसरली आहे.