पोलिसांच्या भीतीने दोघींची इमारतीवरून उडी

मुंबई: ग्रँट रोड येथील लॅमिंग्टन रोडवर एका इमारतीत पोलिसांनी छापा मारल्याने पोलिसांच्या कारवाईपासून वाचण्यासाठी देहविक्री करणाऱ्या दोन महिलांनी इमारतीच्या तिसऱ्या मजल्यावरून उडी मारल्याची धक्कादायक घटना समोर आली आहे. या दुर्घटनेत दोघींचाही मृत्यू झाला असून याप्रकरणी पोलीस अधिक तपास करत आहेत.

डी.बी. मार्ग पोलीस ठाण्याच्यामागेच ही ओम निवास इमारत आहे. मंगळवारी रात्री डी. बी. मार्ग पोलिसांनी या इमारतीत सर्च ऑपरेशन सुरू केलं होतं. रात्री १० च्या सुमारास इमारतीच्यामागे दोन महिलांचे मृतदेह पडल्याचे स्थानिकांनी पोलिसांच्या निदर्शनास आणून दिले. या दोघीही रक्ताच्या थारोळ्यात पडल्या होत्या. जखमी अवस्थेतील या दोघींना तात्काळ जेजे रुग्णालयात उपचारासाठी दाखल करण्यात आले असता एकीला डॉक्टरांनी मृत घोषित केले. तर रात्री उशिरा दुसरीचा मृत्यू झाल्याचं पोलिसांनी सांगितलं. या दोघींपैकी एकीचं वय ५१ असून दुसरी महिला ३१ वर्षीची असल्याचं पोलिसांनी सांगितलं. तिसऱ्या मजल्यावरून पडून त्यांचा मृत्यू झाला असावा असा अंदाजही पोलिसांनी वर्तविला आहे.

'पोलिसांनी धाड मारल्यानंतर पळून जात असताना या दोघींचा मृत्यू झाला असावा. खिडकीच्या ग्रीलला रस्सी बांधलेली होती. रस्सीच्या आधारे या दोघी इमारतीच्या खाली उतरत असाव्यात. त्यावेळी तोल जाऊन किंवा पाय घसरून त्या खाली पडल्याने त्यांचा मृत्यू झाला असावा,' असा अंदाज वरिष्ठ पोलीस निरीक्षक नारायण शिंदे यांनी वर्तविला आहे. देहविक्री चालणाऱ्या ठिकाणांवर छापे मारल्यानंतर पोलीस कारवाई पासून वाचण्यासाठी या महिला नेहमीच पळ काढतात. याप्रकरणातही तसंच झालं असावं, असं एका पोलीस अधिकाऱ्याने सांगितलं.

या इमारतीत गेल्या ३० वर्षापासून देहविक्रीचा धंदा सुरू होता. मात्र गेल्या काही दिवसात त्याबाबतच्या मोठ्याप्रमाणावर तक्रारी आल्याने आम्हाला कारवाई करावी लागली. या धंद्यात अल्पवयीन मुली आहेत की नाही याचा शोध घेण्यासाठी आम्ही कारवाई केली. परंतु दुर्देवाने ही घटना घडली, असं एका पोलीस अधिकाऱ्याने सांगितलं.

दरम्यान, यातील ५१ वर्षीय महिलेने लॅमिंग्टन रोडला घरकाम करत असल्याचं तिच्या कुटुंबीयांना सांगितलं होतं. नालासोपारा येथे या महिलेचा मुलगा राहत असून त्याला ती नेहमी पैसे पाठवायची. दुसरी महिला तिच्या बहिणीबरोबर पश्चिम बंगालवरून मुंबईत आली होती. पैशासाठी ती देहविक्री करत होती, अशी माहिती पोलिसांनी दिली.