मेट्रो ३ला गती

म. टा. प्रतिनिधी, मुंबई

कुलाबा-वांद्रे-सीप्झ या भूमिगत मेट्रो ३ प्रकल्पाला गती देण्यासाठी मुंबई मेट्रो रेल कॉर्पोरेशन आज, गुरूवारी आणखी एक पाऊल पुढे टाकणार आहे. बोगदा खणण्यासाठी आणलेली टनेल बोरिंग मशिन बोगद्यासाठी खोदण्यात आलेल्या विहिरीत मुख्यमंत्र्यांच्या हस्ते सोडण्यात येणार आहेत.

मेट्रोच्या भूमिगत मार्गाच्या खोदकामासाठी दोन अजस्त्र मशिन चीनमधून आणल्या आहेत. मुंबई बंदरातून ही दोन मशिन नयानगर, माहीम येथील प्रकल्पस्थळी दाखल झाल्या आहेत. ही मशिन महाकाय असल्याने ती सुट्या भागांच्या स्वरूपात आणली आहेत. भूमिगत मार्गाचा बोगदा खणण्यासाठी प्रकल्पाच्या मार्गात ठिकठिकाणी मोठ्या विहिरी खणण्यात आल्या आहेत. या विहिरींमध्ये ही मशिन सोडल्यानंतर खोदकाम सुरू होणार आहे.

मुख्यमंत्र्यांच्या हस्ते या मशिनचे सुटे भाग विहिरीत टाकण्यात येतील. त्यानंतर पुढील ४० ते ४५ दिवसांत या सुट्या भागांची आत जुळणी होईल आणि मशिनच्या कामाला सुरूवात होईल. अशी आणखी १५ मशिन टप्प्याटप्प्याने आयात होणार आहेत.