अपहरण करून लूटमार करणाऱ्या दोघांना अटक

म. टा. खास प्रतिनिधी, मुंबई

एकट्या दुकट्या महिलेचे अपहरण करून तिच्याकडील मोबाइल फोन, मौल्यवान वस्तू लुटण्याचा उद्योग करणाऱ्या दुकलीला क्राइम ब्रँच युनिट १२च्या पथकाने चोवीस तासांच्या आत पकडले. दहिसर चेकनाक्याकडे गुरुवारी पहाटे चारच्या सुमारास पोलिस असल्याची बतावणी करून एका महिलेचे अपहरण करून तिच्याकडील दोन मोबाइल, पैसे या दुकलीने चोरले होते.

राजेश यादव (३०), नीरज चौधरी (२४) अशी या चोरांची नावे असून, रात्रभर मद्यपान करत धिंगाणा घालणाऱ्या दुकलीने यापूर्वीही या पद्धतीचे गुन्हे केल्याचा कयास आहे. चेकनाक्याजवळ एकट्या महिलेचे अपहरण करून लूटमार करण्यात आल्याची खबर मि‌ळताच युनिट १२चे पथक सतर्क झाले. पथकातील पोलिस नाईक तावडे यांना प्रभारी पोलिस निरीक्षक सुनील जाधव, पोलिस निरीक्षक महेश निवतकर, सचिन गवस यांना ही माहिती दिली. त्यानंतर एपीआय विक्रमसिंह कदम, अतुल आव्हाड, प्रकाश सावंत आदींनी तपास करून दोन्ही आरोपींना अटक केली. त्यानंतर त्यांचा ताबा काशिमिरा पोलिस ठाण्याकडे देण्यात आला.