म. टा. प्रतिनिधी, मुंबई
गुरुवारी घडलेल्या हिमालय पूल दुर्घटनेमधील दोन जखमी रुग्णांना जेजे रुग्णालयामध्ये उपचारासाठी हलवण्यात आले. प्रसून कुमार (२७) आणि रवी शेट्टी (३२) अशी या रुग्णांची नावे आहे.
प्रसून कुमार यांच्या दोन्ही पायांना जबर मार बसला असून उजव्या मांडीच्या हाडाचे चार तुकडे झाले आहेत. त्यांच्यावर शुक्रवारी शस्त्रक्रिया करण्यात आली. रवी शेट्टी यांच्या डोक्याला मार लागल्याने त्यांनाही पुढील उपचारासाठी जेजेमध्ये हालवण्यात आले. शेट्टी यांच्या डोक्याच्या डाव्या बाजूला मार बसला आहे. रुग्णालयात दाखल करताना ते शुद्धीवर होते. त्यांच्याशी संवाद साधण्यात आला तेव्हा त्यांनी प्रतिसादही दिला. रवी शेट्टी हे भिवंडीच्या भाजी मार्केटजवळील रहिवासी आहेत. त्यांच्यावरील पुढील उपचारासंदर्भात नाक-कान-डोळे तज्ज्ञ आणि प्लास्टिक सर्जरी या दोन्ही विभागांशीही संपर्क साधण्यात आला आहे. प्रसन्नकुमार यांना जीटी रुग्णालयातून तर शेट्टी यांना सेंट जॉर्जेस रुग्णालयातून जेजेमध्ये दाखल करण्यात आले.