मुंबई: मरीन ड्राइव्हवर सापडले दोन मृतदेह

म. टा. खास प्रतिनिधी, मुंबई

मरीन ड्राइव्हवर मफतलाल स्विमिंगपूलच्या समोर पोलिसांना शुक्रवारी दोन मृतदेह सापडले. वैद्यकीय तपासणीमध्ये या दोघांचा मृत्यू किटकनाशक प्यायल्याने झाल्याचे उघड झाले आहे. हे दोघे पती पत्नी असल्याचा प्राथमिक अंदाज असून पोलिसांकडून ओळख पटविण्याचे प्रयत्न सुरू आहेत.

मफतलाल स्विमिंगपूल समोरच्या पदपथावर एक महिला आणि एक पुरूष पडले असल्याची माहिती पोलिसांच्या नियंत्रण कक्षाला मिळाली. या माहितीच्या आधारे मरीन ड्राइव्ह पोलीस घटनास्थळी पोहोचले. त्यांनी दोघांना जीटी रुग्णालयात नेले. डाॅक्टरांनी दोघांनाही तपासून मृत घोषित केले. वैद्यकीय अहवालात किटकनाशकाचे सेवन केल्यामुळे दोघांचा मृत्यू झाल्याचे स्पष्ट झाले. महिलेचे वय अंदाजे ३५ तर पुरूषाचे वय ४५ ते ५० वर्षे असल्याचे पोलिसांनी म्हटले आहे. दोघांकडे केवळ काही पैसे मिळाले मात्र ओळख पटविण्यासारखे काहीच सापडले नाही. त्यांच्या कुटुंबियांनी बेपत्ता झाल्याची तक्रार कुठे केली आहे का? याची माहीती पोलीस घेत आहेत.