म. टा. प्रतिनिधी, मुंबई
ट्रान्सहार्बरवर प्रवासी प्रतिसादाच्या प्रतीक्षेत असलेल्या वातानुकूलित लोकलची घडी बसण्यापूर्वीच आणखी दोन लोकल मध्य रेल्वेवर दाखल झाल्या आहेत. वाढीव तिकीटदरांमुळे प्रवाशांनी पहिल्या एसी लोकलला नाकारल्याचे दिसून येते. यामुळे आणखी वातानुकूलित लोकल प्रवाशांसाठी रुजू केल्यास पुन्हा सामान्य लोकल फेऱ्यांवर गदा येण्याची शक्यता आहे.
धावत्या लोकलमधून होणारे अपघात टाळण्यासह धावत्या लोकलमधील भुरटे चोर, अनधिकृत फेरीवाले, फटका पद्धतीने होणारे गुन्हे रोखण्यासाठी वातानुकूलित लोकल सुरू करण्याचा निर्णय रेल्वे मंडळाने घेतला. त्यानुसार मध्य रेल्वेच्या ट्रान्सहार्बर मार्गावर वातानुकूलित लोकल सुरू झाली. वातानुकूलित लोकलचे तिकीट सामान्य लोकलपेक्षा महाग आहे. यामुळे अनेक प्रवाशांनी याकडे पाठ फिरवली. शिवाय पाच दिवसांचा आठवडा या तत्त्वानुसार अर्थात सोमवार ते शुक्रवार एसी लोकल धावत आहे. वातानुकूलित लोकलच्या फेऱ्या मर्यादित असल्याने त्याचा पुरेपूर लाभ प्रवाशांना मिळत नाही. यामुळे या लोकलला अपेक्षित प्रतिसाद मिळत नाही. किंबहुना या लोकलच्या पुढे व मागे धावणाऱ्या लोकलमध्ये दोन लोकलची गर्दी होत असल्याचे दिसून आले आहे.
(हार्बरवरही वातानुकूलित...९)
सुट्टीच्या दिवशीही एसी लोकल
सध्या मध्य रेल्वेवर दोन वातानुकूलित लोकल दाखल झाल्या आहेत. यापैकी एक ट्रान्सहार्बर मार्गावर धावत असून दुसरी वातानुकूलित लोकल कुर्ला कारशेडमध्ये सज्ज होत आहे. तिसरी लोकल मुंबईत दाखल झाल्यानंतर दोन लोकलच्या मदतीने लोकल फेऱ्या वाढवून सुट्टीच्या दिवशी ही लोकल चालवण्याचे नियोजन आहे. तीनपैकी एक लोकल राखीव ठेवण्यात येईल, असे मध्य रेल्वेचे मुख्य जनसंपर्क अधिकारी शिवाजी सुतार यांनी सांगितले.