राज्य सरकारमध्ये पारदर्शकता आणणार

sanjay.vhanamane@timesgroup.com

Tweet : @sanjayvMT

मुंबई : मुंबई महापालिकेच्या कारभारात पारदर्शकता आणण्याबाबतचा सूर भाजपने पालिका प्रचारात आळवला आहे. त्या पार्श्वभूमीवर पुढील काळात शिवसेनेने राज्य सरकारमध्ये पारदर्शकता आणून सरकारचा प्रत्येक व्यवहार नागरिकांपुढे खुला करण्याची रणनीती आखण्यास सुरुवात केली असल्याचे सूतोवाच पक्षप्रमुख उद्धव ठाकरे यांनी ‘महाराष्ट्र टाइम्स’शी बोलताना केले.

मुंबई महापालिकेतील कारभारावर टीका करताना भाजपने पालिकेत आम्हाला निवडून द्या, आम्ही सर्व कारभारात पारदर्शकता आणू अशाप्रकारची भूमिका निवडणूक प्रचारात मांडली आहे. याबाबत उद्धव म्हणाले की, महापालिकेच्या कारभारात आधीपासूनच पारदर्शकता आहे. त्यामुळे भाजपच्या वक्तव्याकडे फारसे आम्ही लक्ष देत नाही. मात्र महापालिकेची निवडणूक जिंकल्यानंतर आम्ही पुढील काळात राज्य सरकारमध्ये अधिकाधिक पारदर्शकता आणण्यावर भर देणार आहोत. कोणत्या सचिवाने कोणत्या फाइलवर कधी सही केली, नागरिकांच्या हितासाठी कोणते निर्णय घेतले यापासून ते कंत्राटे, योजना यांना मान्यता देताना कोणती पद्धती अवलंबली गेली, या सर्व गोष्टी आम्ही नागरिकांपुढे खुलेपणाने मांडल्या जाव्यात यासाठी आग्रही राहणार आहोत.