घोटाळेबाज आरोप करतात, हे लज्जास्पद!

मटा ऑनलाइन वृत्त । मुंबई

सिंचन, लॉटरी, आदर्श, कोळसा असे घोटाळे करणारे घोटाळेबाज लोक आज आमच्यावर ज्या पद्धतीने चिखल उडवताहेत, ते लांच्छनास्पद आहे. घोटाळे केले म्हणून जनतेनं त्यांना हटवलं, तरीही त्यांना स्वतःच्या कृत्याची लाज वाटत नाही. त्यांच्याच घोटाळ्यांची चौकशी करून दोषींवर कारवाई व्हायला हवी, अशी चपराक शिवसेनेचे पक्षप्रमुख उद्धव ठाकरे यांनी लगावली.

'आरोप कर आणि घे राजीनामा', हा पायंडा महाराष्ट्राच्या प्रतिमेला साजेसा नाही. आम्ही सुभाष देसाई यांच्या पाठीशी पक्ष भक्कमपणे उभे आहोत, असंही उद्धव यांनी नमूद केलं.

एमआयडीसी जमीन घोटाळ्याच्या विरोधकांच्या आरोपांनंतर, सुभाष देसाई यांनी काल उद्धव ठाकरे यांच्याशी चर्चा केली होती. नैतिकतेच्या मुद्द्यावर मी राजीनामा देतो, पदाला चिकटून राहण्यात मला स्वारस्य नाही, असं देसाईंनी सांगितल्यावर, उद्धव यांनी त्यांना होकार दिला होता. त्यानुसार, देसाईंनी आज आपल्या मंत्रिपदाचा राजीनामा मुख्यमंत्री देवेंद्र फडणवीस यांच्याकडे सोपवला. पण तो फडणवीसांनी नाकारला. या पार्श्वभूमीवर, उद्धव ठाकरे यांनी सुभाष देसाईंची पाठराखण केली आणि विरोधकांचा समाचार घेतला.

सुभाष देसाईंनी सगळं प्रकरण माझ्यापुढे ठेवलंय. ते चौकशीला तयार आहेत आणि राजीनामाही द्यायची त्यांची तयारी होती. परंतु, मुख्यमंत्र्यांनी त्यांना थांबवलं. या संदर्भात माझं मुख्यमंत्र्यांशी बोलणं झालं. तेव्हा, 'चोर तो चोर वर शिरजोर', ही विरोधकांची प्रवृत्ती असल्याचं त्यांनी सांगितलं. त्यांची पापं काढू नयेत म्हणून ते खोटं अवसान आणत असल्याचंही फडणवीस म्हणाल्याचं उद्धव यांनी स्पष्ट केलं. त्याचवेळी, विरोधकांच्या घोटाळ्यांची चौकशी करा आणि दोषी आढळल्यास शिक्षा करा, अशी मागणीही त्यांनी केली.