संपत्तीचं प्रकरण हाताळण्यास उद्धव सक्षम!

मटा ऑनलाइन वृत्त । मुंबई

महाराष्ट्र नवनिर्माण सेनेचे अध्यक्ष राज ठाकरे हे शुक्रवारी अचानक 'मातोश्री'वर पोहचल्यानंतर ही भेट संपत्तीवाद किंवा राजकीय समीकरणांसाठी असावी, अशा विविध चर्चांना उधाण आलं होतं. मात्र संपत्तीवादाचं प्रकरण हाताळण्यास उद्धव ठाकरे सक्षम असून कोणत्याही प्रकारची राजकीय चर्चा झाली नसल्याचं सांगत शिवसेनेचे खासदार संजय राऊत यांनी चर्चांना पूर्णविराम देण्याचा प्रयत्न केला.

अलिकडेच जयदेव ठाकरे यांनी संपत्तीवादावरून न्यायालयामध्ये वादग्रस्त वक्तव्य केलं होतं. या पार्श्वभूमीवर राज यांनी उद्धव यांची भेट घेतल्याच्या चर्चा सुरू होत्या. मात्र उद्धव हे राज यांचे मोठे भाऊ आहेत, कुटुंबाचे कर्ते पुरुष आहेत. त्यामुळं संपत्तीवादाचं प्रकरण हाताळण्यास ते सक्षम असल्याचं संजय राऊत यांनी सांगितलं.

'राज आणि उद्धव ठाकरे यांची भेट कौटुंबिकच होती. राहुल गांधी आणि वरुण गांधी दिल्लीत रोज भेटतात, म्हणून काय रोज ढवळून काढायचं का?', असा सवाल संजय राऊत यांनी केला. 'राज-उद्धव हे दोघे भाऊ आहेत. त्यांनी चर्चा एकांतात नाही करायची तर का शिवाजी पार्कात करायची? भाऊ किंवा दोन नेते भेटतात तेव्हा चर्चा ही बंद खोलीतच होते', असंही राऊत म्हणाले.

'राज ठाकरे 'मातोश्री'वर गेले, उद्धव ठाकरे यांना वाढदिवसाच्या शुभेच्छा दिल्या. आदरातिथ्य करण्याची 'मातोश्री'ची परंपरा आहे. राज ठाकरे तर घरातलेच आहेत', असं म्हणत त्यांनी ही भेट राजकीय नसल्याचं स्पष्ट केलं. 'महापालिका निवडणुकीच्या संदर्भात शिवसेना पक्ष प्रमुखांच्या 'मन की बात' लवकरच समोर येईल. निवडणुका फार लांब नाहीत. शिवसेनेच्या मोठ्या विजयासाठी निर्णय घेण्याचे सर्वाधिकार उद्धव ठाकरे यांना आहेत', असंही ते म्हणाले.