उद्धव ठाकरे-राणे शुक्रवारी एकत्र येणार?

मटा ऑनलाइन वृत्त । मुंबई

राज्याच्या राजकारणात एकमेकांचे कट्टर शत्रू म्हणून ओळखले जाणारे व एकमेकांवर टीका करण्याची एकही संधी न सोडणारे शिवसेनेचे पक्षप्रमुख उद्धव ठाकरे व काँग्रेस नेते नारायण राणे लवकरच एका व्यासपीठावर येण्याची शक्यता आहे. मुंबई-गोवा महामार्ग चौपदरीकरण भूमीपूजन सोहळ्यात हे दुर्मिळ चित्र दिसणार आहे.

गेली अनेक वर्षे दुर्लक्षित राहिलेल्या मुंबई-गोवा महामार्गाचं चौपदरीकरण करण्याची घोषणा केंद्रीय दळणवळणमंत्री नितीन गडकरी यांनी केली आहे. हे काम लवकरात लवकर पूर्ण करण्याचा चंग त्यांनी बांधला असून येत्या २३ जूनला सिंधुदुर्ग जिल्ह्यातील कुडाळ येथे या कामाचं भूमीपूजन होणार आहे. नितीन गडकरी आणि मुख्यमंत्री देवेंद्र फडणवीस यांच्या उपस्थितीत हा कार्यक्रम होणार आहे. राज्यातील सत्तेत असलेल्या एका पक्षाचे नेते म्हणून उद्धव ठाकरे यांना या कार्यक्रमाचं निमंत्रण देण्यात आलं आहे. तर, राजशिष्टाचारानुसार जिल्ह्यातील स्थानिक आमदार म्हणून नितेश राणे आणि विधान परिषद आमदार नारायण राणे यांनाही कार्यक्रमाचं निमंत्रण आहे. दोन्ही नेत्यांनी आमंत्रण स्वीकारून कार्यक्रमाला हजेरी लावल्यास २३ जूनला एक वेगळंच चित्र महाराष्ट्राला पाहायला मिळणार आहे.

जवळपास दशकभरापूर्वी नारायण राणे यांनी उद्धव ठाकरे यांच्या नेतृत्वावर तोफ डागत शिवसेना सोडली होती. तेव्हापासून हे नेते सतत एकमेकांवर टीका करत आले आहेत. अलीकडं राजकीय वजन घटल्यानं नारायण राणे शांत असले तरी त्यांचे पुत्र आमदार नीतेश राणे व माजी खासदार नीलेश राणे हे शिवसेनेवर व उद्धव ठाकरेंवर टीका करत असतात. या साऱ्या पार्श्वभूमीवर दोन्ही नेते एकाच व्यासपीठावर आल्यावर नेमकं काय घडतं, याकडं राजकीय वर्तुळाचं लक्ष लागलं आहे.