ठाकरे गटाच्या जिव्हारी लागले; काँग्रेसचे देवरा, पटेल आणि गायकवाड मुख्यमंत्र्यांना भेटले

म. टा. विशेष प्रतिनिधी, मुंबई ः अंधेरी पूर्व येथील पोटनिवडणुकीत काँग्रेसने शिवसेना (बाळासाहेब उद्धव ठाकरे) पक्षाला ( Uddhav Thackeray ) पाठिंबा दर्शवला असला तरी यावरून पक्षात कुरबुर सुरू आहे. थेट सोनिया गांधी यांनी सांगितल्यामुळेच काँग्रेसच्या मुंबईतील नेतृत्वाला हा पाठिंबा द्यावा लागला आहे. मात्र असे असतानाही मिलिंद देवरा ( Milind Deora ), माजी मंत्री वर्षा गायकवाड व देवरा ( Varsha Gaikwad ) यांचे विश्वासू अमिन पटेल या तिघांनी बीडीडी चाळीतील रहिवासी आणि धारावी पुनर्विकासाच्या नावाखाली मुख्यमंत्री एकनाथ शिंदे ( Eknath Shinde ) यांची घेतलेली भेट ठाकरे गटाच्या जिव्हारी लागली आहे.

मिलिंद देवरा हे सातत्याने शिवसेनेसोबत आघाडी करण्याच्या विरोधात आपले मत प्रदर्शित करत आहेत. मात्र उद्धव ठाकरे यांनी थेट भाजपच्या शिर्षस्थ नेतृत्वाच्या विरोधात घेतलेल्या भूमिकेमुळे काँग्रेस पक्षश्रेष्ठी त्यांच्या बाजूने झाल्याचे काँग्रेसच्या एका ज्येष्ठ नेत्याने 'मटा'ला सांगितले. मात्र या भूमिकेमुळे काँग्रेसकडे उरलेली मुस्लिम आणि दलित मतेही शिवसेना (बाळासाहेब उद्धव ठाकरे) पक्षाच्या बाजूने वळण्यास सुरुवात होऊ शकते. तसे झाल्यास येणाऱ्या मुंबई महापालिका व २०२४ साली येणाऱ्या विधानसभा व लोकसभा निवडणुकांमध्ये काँग्रेसला याचक म्हणून या पक्षाकडे जावे लागेल, असे काँग्रेसमधील काही स्थानिक नेत्यांना वाटत आहे. या पार्श्वभूमीवरच अंधेरी पूर्व येथील काही स्थानिक पदाधिकाऱ्यांच्या मनातील नाराजी वाढविण्याचे काम या नेत्यांकडून पद्धतशीरपणे केले जात असल्याचे विश्वसनीय सूत्रांनी सांगितले.

'अंधेरी पूर्व' पोटनिवडणूक; राज ठाकरेंच्या त्या पत्रामागे भाजपचीच खेळी?, चर्चांना उधाण

'निवडणुकीनंतरही भेट घेता आली असती!'

देवरा, पटेल व गायकवाड यांनी मुख्यमंत्री शिंदे यांनी घेतलेल्या भेटीचे अनेक राजकीय अन्वयार्थ काँग्रेसमध्ये लावले जात आहेत. ज्या ज्येष्ठ नेत्यांनी ज्या मुद्द्यांवर ही भेट घेतली, ती निवडणुकीनंतरही घेता आली असती. मात्र संपूर्ण राज्याचे या पोटनिवडणुकीकडे लक्ष लागलेले असताना दोन आमदार व एक माजी खासदार ही भेट घेतात यातून ते नक्की कोणता संदेश देऊ इच्छितात, असा प्रश्न शिवसेना (बाळासाहेब उद्धव ठाकरे) पक्षाच्या एका खासदाराने नाव न प्रसिद्ध करण्याच्या अटीवर 'मटा'शी बोलताना विचारला. दुसरीकडे काँग्रेसमधील अनेकजणांनी या भेटीबद्दल नाराजी व्यक्त केली. मात्र या ज्येष्ठांना बोलणार कोण, दिल्लीतील नेते सर्व पाहात आहेत, त्यांनीच काय तो त्यांना संदेश द्यावा, असे काँग्रेसमधील एका पदाधिकाऱ्याने सांगितले.

बिनविरोधाची मागणी मिलीभगत, ठाकरे गटाच्या आरोपावर राज म्हणाले, घ्यायचं तर घ्या, नाहीतर...