'मेट्रो २-ब'बाबत तज्ज्ञांचे मत
म. टा. विशेष प्रतिनिधी, मुंबई
डी.एन.नगर ते मंडाळा हा मेट्रो २-ब मार्ग एस.व्ही. रोडच्या काही भागांत एलिव्हेटेड न करता भुयारी करावा, अशी मागणी स्थानिकांनी केली असली तरी अत्यंत गजबजलेल्या या भागात भुयारी मार्गाचे बांधकाम करणे अशक्य असल्याचे तज्ज्ञांचे मत आहे. शिवाय या भागात काही ठिकाणी भुयारी मार्ग व नंतर पुन्हा एलिव्हेटेड मार्ग बांधल्यास अन्य भागांतील नागरिक आक्षेप घेण्याची शक्यता आहे. एकूणच प्रकल्पाला गती मिळाली असताना या टप्प्यावर प्रकल्पाच्या आराखड्यात बदल करणे अशक्य असल्याचे सांगण्यात येते.
मेट्रोच्या सर्व प्रकल्पांपैकी मेट्रो २-ब हा मार्ग बांधणीच्या दृष्टीने सर्वाधिक आव्हानात्मक तसेच कटकटीचा आहे. तो एलिव्हेटेड न करता भूमिगत करावा अशी विनंती करणारी याचिका जुहू विलेपार्ले डेव्हलपमेंट कोऑपरेटिव्ह हाऊसिंग असोसिएशन, गुलमोहर सोसायटीज एरिया ग्रुप व डॉ. बालाभाई नानावटी रुग्णालयाने उच्च न्यायालयात केली आहे. एलिव्हेटेड मार्गामुळे आमची गैरसोय होईल, असे स्थानिकांचे म्हणणे आहे. मात्र मार्गाच्या आराखड्यात बदल करणे आता अशक्य असल्याचे तज्ञांचे म्हणणे आहे.
भूमिगत मार्गात टनेल बोअरिंग यंत्रासाठी महाकाय अशा विहिरी बांधाव्या लागतात. त्यासाठी मोठी जागा गरजेची असते. अशी जागा उपलब्ध झाल्यावर पुन्हा बॅरिकेडस लावून ती बंदिस्त करावी लागते. जवळपास ७०० मीटरची जागा त्याकरिता आवश्यक असते. मुंबईतील सर्वाधिक वर्दळीचे व प्रचंड वाहतूक असणारे जे काही प्रमुख मार्ग आहेत, त्या मार्गांमध्ये एस.व्ही. रोडचा समावेश होतो. साहजिकच सुमारे ७०० मीटर जागा मेट्रोच्या कामासाठी कोण आणिण कुठून उपलब्ध करून देणार, असा प्रश्न आहे. शिवाय या कामासाठी जलवाहिन्या तसेच मल:निसारण वाहिन्या अन्यत्र न्याव्या लागतील. हे काम अत्यंत कटकटीचे आहे. त्यामुळे मार्ग भूमिगत करणे शक्य नाही, असे 'एमएमआरडीए'च्या एका वरिष्ठ इंजिनीअरने सांगितले.
'मेट्रो २-ब' आव्हानात्मक
'मेट्रो २-ब'चा मार्गच मुळात आव्हानात्मक आहे. यासाठी वांद्र्यातील काही स्कायवॉक अंशत: तोडावे लागणार आहेत. मध्य, पश्चिम तसेच हार्बर अशा तिन्ही रेल्वे मार्गांवरून या मेट्रोचा मार्ग जाणार आहे. घाटकोपर वर्सोवा मेट्रो १ मार्गाच्या डी.एन.नगर स्थानकाला मेट्रो २-ब या मार्गाची जोडणी मिळणार आहे. त्यानंतर वांद्रे पश्चिम रेल्वे, आयटीओ जंक्शन मेट्रो ३, कुर्ला पूर्वेला मध्य रेल्वे तसेच मेट्रो ४, चेंबूरला मोनोरेल व मानखुर्द येथे हार्बर रेल्वे असा विविध भागांना तसेच उपनगरीय रेल्वेसह मेट्रोच्या अन्य मार्गाला जोडणी देत या मेट्रो मार्गाचा प्रवास आहे.