शिक्षण-मनोरंजनाचा अनोखा मिलाफ

प्रथमेश राणे, कॉलेज क्लब रिपोर्टर

मुंबई :

लगोरी, विटी-दांडू या मैदानी खेळांबरोबरच नवा व्यापार, सापशिडी असे बालपणीचे घरगुती खेळ आता विद्यार्थ्यांना खऱ्याखुऱ्या ‘प्लेकोर्ट’वर खेळण्याची संधी सांताक्रूझच्या एल. एस. रहेजा कॉलेजच्या ‘पॅरालॅक्स-१८’ या फेस्टिव्हलमध्ये मिळणार आहे. ११,१२ आणि १३ जानेवारीला रंगणाऱ्या या फेस्टिव्हलचा ‘महाराष्ट्र टाइम्स’ मीडिया पार्टनर आहे.

रहेजा कॉलेजच्या सेल्फ फायनान्स विभागातर्फे आयोजित या फेस्टिव्हलमध्ये ‘क्वीझ’, ‘लाइव्ह शेअर बाजार’, ‘बी अ डिटेक्ट‌वि’ अशा अभ्यासपूर्ण खेळांसह फोटोग्राफी, बिट बॉक्सिंग, फॅशन शो, ट्रेझर हंट अशा गमतीदार खेळांचाही समावेश आहे. तीन दिवस रंगणाऱ्या ‘पॅरालॅक्स-१८’मध्ये मुंबई व आजूबाजूच्या परिसरातील ३५हून अधिक कॉलेजे सहभागी होणार आहेत. ‘फेस्टिव्हलच्या निमित्ताने विद्यार्थ्यांना त्यांचे कौशल्य दाखवण्याची उत्तम संधी मिळणार आहे’, असा विश्वास रहेजा
कॉलेजचे प्राचार्य डॉ. देवजित सरकार यांनी व्यक्त केला.

>>‘लॅन गेमिंग’ची क्रेझ!
तरुणाईच्या विश्वात ‘लॅन गेमिंग’ची जोरदार चर्चा आहे. काऊंटर स्ट्राइक १.६, फिफा, एनएफएस मोस्ट वॉन्टेड, क्लॅश रॉयल, असे दमदार गेम्स ‘पॅरालॅक्स-१८’मध्ये पाहायला मिळतील. १२ जानेवारीला रंगणाऱ्या या ‘लॅन गेमिंग’मध्ये एका संघात पाच ते सात खेळाडू सहभागी होऊ शकणार आहेत.

>>व्याकरणाचे आव्हान
मराठी असो वा इंग्रजी माध्यम, व्याकरण म्हटले की लहानपणी काहींची भंबेरी उडायची, तर काहींना पैकीच्या पैकी गुण मिळायचे. हीच व्याकरण आणि शब्दांच्या खेळाची मजा ‘वर्ड्स वर्थ’ या खेळामध्ये स्पर्धकांना अनुभवता येणार आहे.

>>‘लोक अदालत’ची चर्चा
रहेजा कॅम्पसमध्ये आता थेट ‘लोक अदालत’ही उभे राहणार आहे. यामध्ये स्वतःच वकील होऊन स्वतःला निर्दोष सिद्ध करावे लागणार आहे. अर्थातच, न्यायधीशांचा निर्णय अंतिम राहील. या खेळाचे नियम स्पर्धेच्या दिवशीच सांगितले जाणार आहेत.