उरणमधील घुसखोरांची रेखाचित्रं जारी

मटा ऑनलाइन वृत्त । मुंबई

रायगड जिल्ह्यातील उरणजवळच्या नौदल तळाजवळ संशयास्पदरित्या वावरणाऱ्या संशयित घुसखोरांची रेखाचित्रं पोलिसांनी जारी केली असून विविध सुरक्षा यंत्रणांनी युद्धपातळीवर शोधमोहीम हाती घेतली आहे. घुसखोरीच्या वृत्तानंतर मुंबईसह किनारपट्टीच्या भागात सतर्कतेचा इशारा देण्यात आला आहे. खबरदारीचा उपाय म्हणून उरणसह आसपासच्या भागांतील सर्व शाळा व महाविद्यालयं आज बंद ठेवण्यात आली आहेत.

उरण एज्युकेशन सोसायटीच्या शाळेतील काही मुलांनी काल सकाळी शस्त्रसज्ज घुसखोरांना पाहिले होते. मुलांनी केलेल्या वर्णनावरून काल रात्री पोलिसांनी संशयित घुसखोरांची रेखाचित्रं जारी केल्याचं वृत्त पीटीआयनं दिलं आहे. नौदलाचे प्रवक्ते राहुल सिन्हा यांनी दिलेल्या माहितीनुसार, शाळकरी मुलांनी पाच ते सहा संशयितांना पाहिले होते. या लोकांनी पठाणी सूट घातले होते. त्यांच्या हातात शस्त्र व पाठीवर बॅगा होत्या.

संशयित घुसखोरांची माहिती मिळताच नौदल, तटरक्षक दल, केंद्रीय औद्योगिक सुरक्षा दल आणि क्युआरटी यांनी उरण व करंजा भागात कोम्बिंग ऑपरेशन हाती घेतले. हे ऑपरेशन आजही सुरूच असून अद्याप एकही संशयित हाती लागलेला नाही. नौदलाचे हेलिकॉप्टर व हायस्पीड बोटींही समुद्रावर गस्त घालत असून एनएसजी व फोर्स वन कमांडोंचीही मदत घेण्यात आल्याचं पोलिसांनी सांगितलं.