म. टा. विशेष प्रतिनिधी, मुंबई
करोनाच्या वाढत्या रुग्णांमुळे रूग्णवाहिका कमी पडू लागल्या आहेत. त्यामुळे महापालिकेने आता बेस्ट बस आणि एसटीचा रुग्णवाहिका म्हणून वापर सुरू केला आहे. सध्या बेस्ट व एसटीच्या ८५ बस रुग्णवाहिकेची सेवा बजावत असून या बसमध्ये एक चालक व मदतनीस यांची नियुक्ती करण्यात आली आहे.
मुंबईत दररोज सुमारे ८०० ते एक हजार पॉझिटिव्ह रुग्ण सापडत आहेत. या रुग्णांना रूग्णालये व करोना केअर सेंटरमध्ये नेण्यास रुग्णवाहिका कमी पडू लागल्या आहेत. सध्या करोना रुग्णांची ये-जा करण्याकरता १०८ क्रमांकाच्या ६० रुग्णवाहिका आहेत. तसेच पालिकेने २० रूग्णवाहिका भाडेतत्त्वावर घेतल्या आहेत. मात्र वाढत्या रुग्णसंख्येमुळे रुग्णवाहिकांची संख्या कमी पडत आहे.
एखाद्या परिसरात रुग्ण सापडला तर तात्काळ रुग्णवाहिका उपलब्ध होत नसल्याच्या अनेक तक्रारी पालिकेच्या विभाग कार्यालयात आल्या आहेत. नगरसेवकांनीही याकडे लक्ष वेधले होते. त्यामुळे प्रशासनाने बेस्टच्या ७० बस व एसटीच्या १५ बसचे रुग्णवाहिकेमध्ये रूपांतर केले आहे. या बसमधील चालक व मदतनीस त्यांना एक आठवडा पुरेल इतके पीपीई किट पुरवण्यात येत आहे.
भाड्यानेही घेणार
पालिका आयुक्त इक्बाल सिंग चहल यांनी मुंबईतील १०० करोना केअर केंद्रांमध्ये दोन रुग्णवाहिका तैनात ठेवण्याचा आदेश दिला आहेत. त्यामुळे आणखी काही रुग्णवाहिका भाड्याने घेण्याचा पालिकेचा विचार आहे.