- ऑनलाइन केली खरेदी
- निर्मलनगर पोलिस ठाण्यात गुन्हा
म. टा. खास प्रतिनिधी, मुंबई
देशात करोनामुळे परिस्थिती गंभीर असतानाही भामट्यांनी मात्र आपला फसवणुकीचा धंदा सुरूच ठेवला आहे. वांद्रे येथील ६७ वर्षीय वृद्धाने ऑनलाइन एन-९५ हे चांगल्या दर्जाचे मास्क मागविले. मात्र, प्रत्यक्षात त्याला व्ही-४४ हे हलक्या प्रतीचे मास्क पाठविण्यात आले. फसवणूक झाल्याप्रकरणी या वृद्धांनी केलेल्या तक्रारीवरून निर्मलनगर पोलिस ठाण्यात गुन्हा दाखल करण्यात आला आहे.
करोना विषाणूच्या वाढत्या प्रादुर्भावामुळे मास्क आणि सेनिटायझरची मागणी प्रचंड वाढली आहे. वांद्रे निर्मलनगर येथे राहणाऱ्या नवीन (बदललेले नाव) यांना मधुमेह, दम्याचा त्रास होता. त्यातच करोनाचा धोका असल्याने नवीन हे परिसरातील केमिस्टमध्ये गेले आणि एन-९५ मास्कची मागणी केली. मात्र, परिसरातील सर्वच केमिस्टमध्ये मास्क संपले होते. याबाबत त्यांनी आपल्या परिचयातील एका व्यक्तीला विचारले असता, त्यांनी एका नामांकित ऑनलाइन पोर्टलवर उपलब्ध असल्याचे सांगितले. नवीन यांनी मित्राने सांगितल्यानुसार या पोर्टलवर ते शोधले असता, त्यांना १०९९ रुपयांना दोन एन-९५ मास्कचे पॅक मिळत असल्याचे दिसले. त्यांनी तत्काळ हे दोन मास्क ऑर्डर केले. नवीन यांच्या घरी मास्कची डिलिव्हरी आल्यानंतर त्यांनी मास्क उघडून पाहिले त्यावेळी पार्सलमध्ये एन-९५ ऐवजी व्ही-४४ हे मास्क आढळले. याबाबत विचारले असता, समाधानकारक उत्तर मिळाले नसल्याने नवीन यांनी पोलिसांत धाव घेतली. अशाप्रकारे ऑनलाइन विक्रीच्या माध्यमातून अनेकांची फसवणूक केली जात असल्याचा आरोप त्यांनी केला आहे. फसवणुकीचा गुन्हा दाखल करून घेत नवीन यांनी दिलेल्या तांत्रिक पुराव्यांवरून पुढील तपास केला जात असल्याचे निर्मलनगर पोलिसांनी सांगितले.