वैजयंतीमाला, कपिल यांचा आज गौरव

षण्मुखानंदमध्ये रंगणार दीनानाथ पुरस्कार सोहळा

म. टा. प्रतिनिधी, मुंबई

मास्टर दीनानाथ स्मृती प्रतिष्ठानतर्फे दिल्या जाणाऱ्या दीनानाथ पुरस्कारांचे आज, सोमवारी सायन येथील षण्मुखानंद सभागृहात वितरण होणार आहे. ज्येष्ठ अभिनेत्री वैजयंतीमाला, माजी क्रिकेट कर्णधार कपिल देव, ज्येष्ठ साहित्यिक विजया राजाध्यक्ष, ज्येष्ठ अभिनेत्री आशालता वाबगावकर, शास्त्रीय गायिका कौशिकी चक्रवर्ती यांना या सोहळ्यात गौरवण्यात येणार आहे. हृदयेश आर्टस् आणि जयस्त चॅरिटेबल ट्रस्टच्या माध्यमातून आयोजित या कार्यक्रमाचा ‘महाराष्ट्र टाइम्स’ मीडिया पार्टनर आहे.

दीनानाथ मंगेशकर यांची आज ७५वी पुण्यतिथी आहे. त्यानिमित्त दरवर्षी दीनानाथ मंगेशकर पुण्यतिथी सोहळ्याचे आयोजन करण्यात येते. यात सांगितिक कार्यक्रमाबरोबरच, निरनिराळ्या क्षेत्रात अतुलनीय कामगिरी करणाऱ्यांचा सन्मान करण्यात येतो. विश्वशांती केंद्राचे विश्वनाथ कराड, सावली संस्थेचे किशोर देशपांडे आणि ज्येष्ठ पत्रकार उदय निरगुडकर यांनाही या सोहळ्यामध्ये दीनानाथ पुरस्काराने गौरवण्यात येणार आहे. लक्षवेधी निर्मितीसाठी अभिनेता आमिर खान निर्मिती ‘दंगल’ चित्रपटाची आणि सुनील बर्वे निर्मित ‘अमर फोटो स्टुडिओ’ नाटकाची निवड झाली आहे. सरसंघचालक मोहन भागवत यांच्या हस्ते पुरस्करांचे वितरण होणार आहे. एक लाख रुपये रोख आणि सन्मानचिन्ह असे या पुरस्काराचे स्वरूप आहे.

दीनानाथ मंगेशकर यांच्या मृत्यनंतर लता मंगेशकर यांनी वयाच्या १२व्या वर्षांपासून पुण्यतिथीनिमित्त कार्यक्रम आयोजित करायला सुरुवात केली. तेव्हापासून सलग ७४वर्षे या सोहळ्याचे आयोजन करण्यात येते. विशेष म्हणजे गानसम्राज्ञी लता मंगेशकर यांच्या गानकारकिर्दीलाही यंदा ७५वर्षे पूर्ण होत आहेत. १९८९पर्यंत मंगेशकर कुटुंबीय हा पुण्यतिथी सोहळा आयोजित करत असत. त्यानंतर विविध संस्थांच्या माध्यमातून या सोहळ्याचे आयोजन करण्यात येते.

स्वरांची मानवंदना

पुरस्कार सोहळ्यानंतर होणाऱ्या मर्मबंधांतील ठेव या संगीत मैफलीत मा. दीनानाथ यांना स्वरांची मानवंदना देण्यात येणार आहे. यात शास्त्रीय गायिका कौशिकी चक्रवर्ती, राहुल देशपांडे आणि महेश काळे सहभागी होणार आहेत. या संपूर्ण सोहळ्याचे सूत्रसंचालन सोनाली श्रीखंडे करणार आहेत.