ज्येष्ठ पत्रकार सोमनाथ पाटील यांचं निधन

मटा ऑनलाइन वृत्त । मुंबई

ज्येष्ठ पत्रकार व मुंबई मराठी पत्रकार संघाचे माजी उपाध्यक्ष सोमनाथ पाटील यांचे आज मुंबईत अल्पशा आजाराने निधन झाले. ते ६४ वर्षांचे होते. पाटील यांच्यावर शुश्रुषा रुग्णालयात उपचार सुरू होते. तिथेच त्यांनी अखेरचा श्वास घेतला. पाटील यांच्या निधनामुळे तरुण पत्रकारांचा मार्गदर्शक हरपल्याची भावना व्यक्त होत आहे.

सोमनाथ पाटील यांनी मराठी वृत्तपत्रसृष्टीत १९७७ पासून विविध दैनिकांत सहसंपादक, वृत्तसंपादक, कार्यकारी संपादक अशा पदांची जबाबदारी सांभाळली. याशिवाय स्तंभलेखन आणि विश्लेषण या स्वरूपाचे नियमित लेखनही त्यांनी केले. सकाळ माध्यम समूहात १९७८ ते २००१ दरम्यान उपसंपादक ते सहसंपादक अशा विविध पदांवर त्यांनी काम केले. एकमत आणि गावकरी या दैनिकांमध्ये कार्यकारी संपादक म्हणूनही त्यांनी धुरा वाहिली. १९८४मध्ये पाटील राज्य नागरी सेवा परीक्षा उत्तीर्ण झाले. अखिल भारतीय स्थानिक स्वराज्य संस्थेत संपादक आणि विभागीय संचालक म्हणून काही वर्षे त्यांनी काम केले. ऑगस्ट २०११ पासून ते स्पर्धा परीक्षांशी संबंधित 'स्टडी सर्कल' या मासिकाचे कार्यकारी संपादक म्हणून कार्यरत होते. याशिवाय, राज्य सरकारच्या विविध समित्यांवरही त्यांनी काम केले.

कॉलेज जीवनापासूनच विविध प्रकारचे लेखन करणाऱ्या पाटील यांचा हात सतत लिहिता होता. दैनंदिन पत्रकारिता करतानाच त्यांनी काही पुस्तकेही लिहिली. अर्बन महाराष्ट्र, टुवर्ड्स गुड अर्बन लाइफ (इंग्रजी) व पत्रकारिता विद्या, तिसरी मुंबई (दोन खंड), शहरे, स्मार्ट शहरे आणि पसरती मुंबई ही पुस्तके त्यांनी लिहिली. 'तिसरी मुंबई' या पुस्तकासाठी त्यांना मुंबई मराठी पत्रकार संघाच्या आप्पासाहेब पेंडसे पुरस्काराने गौरवण्यात आले होते तर, हाँगकाँगच्या ऐतिहासिक हस्तांतर सोहळ्यास उपस्थिती आणि त्या सोहळ्याच्या वार्तांकनाबद्दल त्यांना बॅरिस्टर नाथ पै पुरस्काराने सन्मानित करण्यात आले होते.

शासकीय विद्या निकेतन, नाशिक-धुळे माजी विद्यार्थी संघटनेचे संस्थापक अध्यक्ष, मुंबई मराठी पत्रकार संघाचे माजी उपाध्यक्षपदही त्यांनी भूषविले होते.