युद्धपातळीवर काम सुरू
मुंबई : आधुनिक तंत्रज्ञानामुळे जग झपाट्याने बदलत आहे. मुंबई पोलिस दलही आता हाय-टेक होत आहे. आठ तास ड्युटीच्या यशस्वी संकल्पनेनंतर मुंबई पोलिस आयुक्तांनी शहरातील ९३ पोलिस ठाणी व्हिडीओ कॉन्फरन्सिंगद्वारे जोडण्याचा निर्णय घेतला आहे. ही यंत्रणा उभी करण्याचे काम युद्धपातळीवर सुरू असून लवकरच ही सेवा शहरातील सर्व पोलिस ठाण्यात कार्यान्वित होईल.
मुंबई पोलिसांच्या कार्याची तुलना जगातील सर्वश्रेष्ठ स्कॉटलंड यार्ड पोलिस यंत्रणेशी होत असली तरी अनेकदा तंत्रज्ञानाचा वेग पकडण्यात मुंबई पोलिस कमी पडतात. त्यामुळे तपासाच्या वेगावरही परिणाम होतो. मात्र आता मुंबई पोलिस यंत्रणाही आधुनिक तंत्रज्ञानाच्या मदतीने गतिमान होणार आहे. मुंबईतील १२ झोनमधील ९३ पोलिस ठाणी आणि १२ उपायुक्त कार्यालये व्हिडीओ कॉन्फरन्सिंगच्या माध्यमातून जोडली जाणार आहेत. या यंत्रणेमुळे ९३ पोलिस ठाण्यातील वरिष्ठ पोलिस निरीक्षकांना गुन्ह्यांसंदर्भात किंवा विविध सूचना पोलिस आयुक्तांना मुख्यालयातूनच देणे शक्य होईल. त्यामुळे अधिकाऱ्यांचे काम गतिमान होईलच, शिवाय वेळ आणि इंधनाची बचत होईल.
आतापर्यंत विविध पोलिस ठाण्यातील आणि उपायुक्त कार्यालयातील अधिकारी सूचना आणि परवानगीसाठी पोलिस आयुक्तांची मुख्यालयात येऊन भेट घेतात. आयुक्तांना भेटायला येताना अधिकारी वाहतूक कोंडीत अडकतात. व्यग्र कामातून प्रत्येकाला फोनवरून सूचना देणेही तितकेसे शक्य नाही. त्यामुळेच कॉर्पोरेट क्षेत्रात मोठ्या प्रमाणात वापरल्या जाणाऱ्या या संकल्पनेच्या वापर, मुंबई पोलिस यापुढे करणार आहेत.
उत्साहाचे वातावरण
याआधीही बेशिस्त वाहन चालकांसाठी ई-चलन कारवाई पद्धत, शहरातील गुन्हे आणि आरोपींचा मागोवा काढण्यासाठी उभे केलेले सीसीटीव्हीचे जाळे, पोलिसांवरील कामाचा वाढ ताण कमी करण्यासाठी घेतलेल्या आठ तास ड्युटीच्या निर्णयानंतर गतिमान कार्यपद्धतीसाठी 'व्हिडीओ कॉन्फरन्सिंग'हा मोठा निर्णय आहे. तंत्रज्ञानाच्या मदतीने पोलिस दलात होत असलेल्या बदलामुळे पोलिस कर्मचाऱ्यांमध्येही उत्साहाचे वातावरण आहे.
पोलिसांचा कारभार अधिकाधिक गतिमान व्हावा आणि वेळ वाचावा यासाठी तंत्रज्ञानाचा वापर करण्यात येत आहे. केवळ बैठकासाठी पोलिसांना मुख्यालयात यावे लागू नये, यासाठी हा चांगला पर्याय आहे. लवकरच सर्व पोलिस ठाणी आणि उपायुक्त कार्यालयात व्हिडीओ कॉन्फरन्सिंगची सुविधा कार्यान्वित होईल.
दत्ता पडसलगीकर,
मुंबई पोलिस आयुक्त