विनायक मेटेंच्या अपघाती निधनानंतर पत्नीची प्रकृती बिघडली; उपचार सुरू

मुंबई: शिवसंग्रामचे संस्थापक अध्यक्ष विनायकराव मेटे यांच्या अपघाती निधनामुळे त्यांच्या कुटुंबासह कार्यकर्त्यांवर शोककळा पसरली आहे. मेटे यांच्या पार्थिवावर उद्या बीडमध्ये अंत्यसंस्कार केले जातील. मेटे यांच्या निधनामुळे त्यांच्या कुटुंबीयांवर मोठा आघात झाला आहे.

विनायक मेटे यांच्या निधनानंतर त्यांच्या पत्नीची तब्येत बिघडल्याचं समजतं. त्यांना सलाईन लावण्यात आलं आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस, विरोधी पक्षनेते अजित पवार यांच्यासह अनेक नेत्यांनी मेटे यांच्या कुटुंबीयांची भेट घेत त्यांचं सांत्वन केलं.

मेटे यांच्या पत्नीचं सांत्वन केल्यानंतर अजित पवारांनी त्यांच्या भावना माध्यमांसमोर मांडल्या. मेटे यांचा फोन कधीही स्विच्ड ऑफ लागायचा नाही. पण अपघाताची बातमी समजल्यावर जेव्हा मेटे यांच्या पत्नीनं त्यांना फोन करण्याचा प्रयत्न केला. त्यावेळी तो बंद होता, असं मेटे यांच्या पत्नीनं सांगितल्याची माहिती पवारांनी दिली.
चालकाचे गंभीर आरोप; मात्र पोलिसांकडून तातडीच्या मदतीचा दावा; मेटेंच्या अपघातानंतर नेमकं काय घडलं?
उद्या बीडमध्ये अंत्यसंस्कार
विनायक मेटे यांच्या अपघाती निधनामुळे शिवसंग्रामच्या कार्यकर्त्यांसह बीड जिल्ह्यावर शोककळा पसरली आहे. आज संध्याकाळपर्यंत विनायकराव मेटे यांचं पार्थिव बीड येथे त्यांच्या घरी नेण्यात येणार आहे. उद्या सकाळपासून दुपारी बारा वाजेपर्यंत शिवसंग्राम भवन या ठिकाणी मेटे यांचं पार्थिव अंत्यदर्शनासाठी आणण्यात येणार आहे, अशी माहिती शिवसंग्राम कार्यालयाकडून मिळाली आहे.

दुपारी तीन वाजेपर्यंत विनायक मेटे यांच्या पार्थिवावर अंत्यसंस्कार करण्यात येणार आहेत. दिवंगत नेते गोपीनाथ मुंडे यांच्यानंतर बीड जिल्ह्याला पुन्हा एकदा मोठा धक्का बसला आहे. बीडमधील अजून एक दर्दी नेता हरवल्याने जिल्ह्यावर शोककळा पसरली आहे.