अफझल बनून विष्णूनं दिलेली मुकेश अंबानींना धमकी; चौकशीतून समोर आली धक्कादायक माहिती

मुंबई: रिलायन्स समूहाचे चेअरमन मुकेश अंबानी यांना फोनच्या माध्यमातून धमकी देणाऱ्या व्यक्तीला अटक करण्यात आली आहे. विष्णू विभू भौमिक असं आरोपीचं नाव आहे. भौमिक पेशानं सराफा व्यवसायिक असून दक्षिण मुंबईत त्याचं दुकान आहे. रिलायन्स फाऊंडेशन हॉस्पिटलमध्ये फोन करून भौमिकनं धमकी दिली होती. त्यावेळी त्यानं स्वत:चं नाव अफझल सांगितलं होतं.

विष्णू भौमिक पश्चिम उपनगरातील दहिसरचा रहिवासी आहे. त्यानं आज सकाळी १०.३९ ते दुपारी १२ च्या दरम्यान तब्बल ९ कॉल केले होते. रिलायन्स फाऊंडेशन हॉस्पिटलमध्ये कॉल करून भौमिकनं मुकेश अंबानींना शिवीगाळ करत जीवे मारण्याची धमकी दिली.
अंबानी कुटुंबाला ३ तासात संपवण्याची धमकी देणाऱ्याला अटक, 'अँटिलिया'बाहेर बंदोबस्त वाढवला
गिरगावात असलेल्या रिलायन्स फाऊंडेशन हॉस्पिटलला सकाळी १० वाजून ३९ मिनिटांनी आरोपीनं पहिला कॉल केला. मुकेश अंबानी आणि त्यांच्या कुटुंबाला संपवू अशी धमकी त्यानं दिली होती. याची माहिती मिळताच मुंबई पोलीस अलर्ट झाले. कलम ५०६ (२) च्या अंतर्गत गुन्हा दाखल करून पोलिसांनी शोध सुरू केला. प्रकरणाचं गांभीर्य लक्षात घेऊन काही केंद्रीय तपास यंत्रणांनादेखील याची माहिती देण्यात आली.

विष्णू भौमिकला बोरिवली पश्चिमेतून अटक करण्यात आली आणि त्याला डी. एम. मार्ग पोलीस ठाण्यात आणण्यात आलं. त्याची चौकशी सुरू आहे. भौमिकला अटक करण्यात आली असून त्याची पार्श्वभूमी गुन्हेगारीची आहे का, याचा शोध घेतला जात असल्याचं पोलिसांनी सांगितलं. धमकी देताना भौमिक यांनी एकदा धीरुबाई अंबानी यांच्या नावाचाही वापर केला.
मुकेश अंबानी आणि कुटुंबियांना जीवे मारण्याची धमकी; ३ तासात संपवून टाकण्याची धमकी
गेल्या फेब्रुवारीत मुकेश अंबानींच्या अँटिलिया निवासस्थानाबाहेर एक संशयास्पद कार आढळून आली. त्या कारमध्ये जिलेटिनच्या २० काड्या आढळून आल्या. यामुळे एकच खळबळ उडाली होती. महाराष्ट्र एटीएससह एनआयएनं या प्रकरणाचा तपास केला होता. या प्रकरणात पोलीस अधिकारी सचिन वाझे यांना अटक झाली. एनआयएच्या तपासातून अनेक धक्कादायक बाबी उघडकीस आल्या. त्यामुळे पोलिसांच्या विश्वासार्हतेवरच प्रश्न उपस्थित झालं.