आजपासून रंगणार ‘वोर्टेक्स’

अजय उभारे, मुंबई

रसायनशास्त्र म्हटले की विद्यार्थ्यांच्या मनात कायम भीती आणि कंटाळ्याची भावना असते. त्यातील वेगवेगळी रेणुसूत्रे, रसायनांची कीचकट नावे, त्यांच्या प्रक्रिया अशा अनेक गोष्टींमुळे विद्यार्थ्यांना तो विषयही रटाळ वाटतो. परंतु, माटुंग्याच्या इन्स्टिट्युट ऑफ केमिकल टेक्नॉलॉजीच्या (आयसीटी) ‘वोर्टेक्स१७’ या आजपासून सुरू होणाऱ्या फेस्टिव्हलला भेट दिल्यावर हा भ्रम दूर होईल.

कॉलेजविश्वात इंटरकॉलेज स्पर्धांविषयी एक वेगळेच आकर्षण असते. नियोजनापासून ते प्रत्यक्ष इव्हेण्टचा समारोप होईपर्यंत प्रत्येक गोष्टीसाठी विद्यार्थी खूपच उत्सुक असतात. अगदी इव्हेण्टच्या दिवशीही सगळ्यांची लगबग सुरू असते. असेच उत्साहपूर्ण लगबगीचे वातावरण पाहायला मिळणार आहे ते आयसीटीमध्ये. निमित्त आहे कॉलेजच्या ‘वोर्टेक्स१७’ या इंटरकॉलेजिएट फेस्टिव्हलचे. आजपासून चार दिवस (१२ ते १५ ऑक्टोबर) चालणाऱ्या या उपक्रमात भरपूर मनोरंजनासह विद्यार्थ्यांच्या ज्ञानात भर पडणार आहे. या फेस्टचा महाराष्ट्र टाइम्स मीडिया पार्टनर आहे.

रसायन क्षेत्रासंबंधीचा हा फेस्टिव्हल अनेक मोठ्या फेस्टिव्हल्सपैकी एक आहे. केमिस्ट्रीप्रेमींसाठी अनेक नव्या गोष्टी शिकण्याची उत्तम संधी वोर्टेक्सच्या निमित्ताने विद्यार्थ्यांना मिळणार आहे. ‘Quadrigy-AIR (ऑटोमेट इनोव्हेट अॅन्ड रिव्हॅल्यूशनाइज) अशी या फेस्टिव्हलची यंदाची थीम आहे. प्रोडीजी (PRODIJY), जनरल आणि फार्मा सीरिज अशा तीन विभागांत एकूण २२ स्पर्धांचे आयोजन करण्यात आले आहे. विशेष म्हणजे, एकदा नोंदणी केल्यावर तुम्हाला या सगळ्या स्पर्धा आणि फन इव्हेण्ट्समध्ये सहभागी होता येणार आहे. नोंदणीची सोय फेस्टिव्हलदरम्यान कॉलेजच्या कॅम्पसमध्ये उपलब्ध असेल.

सायन्स, टेक्नॉलॉजी, इंजिनीअरिंग, मॅथेमॅटिक्सवर आधारित काही इव्हेण्ट्स यात होणार आहेत. मॉडेल मेकिंग, मेनीफेस्टो, केमिकल इंजिनिअर ऑफ द इयर, केमवॉर, ओपनिंग बेल, सीएसआय, पोस्टर प्रेझेंटेशन-पपायरससारख्या विविध स्पर्धा या फेस्टिव्हलमध्ये पाहायला मिळतील. शिवाय, विविध कार्यशाळा आणि मार्गदर्शन शिबिरांचा समावेश असलेल्या ‘यान्त’ व ‘फ्लॅगशीप’ नावाच्या वेगळ्या दोन स्पर्धांचे आयोजनही करण्यात आले आहे.

या फेस्टमध्ये सहभागी होण्यासाठी वोर्टेक्सच्या फेसबुक पेजला भेट देता येईल.

अधिक माहितीसाठी संपर्क •अपूर्वा गोमसे - ७५८८११९८१२•आदित्य बसेर – ९०२९९६१७५०