म. टा. प्रतिनिधी, मुंबई
देशहित व लोकशाहीच्या रक्षणासाठी मतदानाचा हक्क तथा कर्तव्य बजावणे अत्यंत आवश्यक असल्याचा संदेश जनमानसात पोहचवण्यासाठी तसेच २१ ऑक्टोबरच्या विधानसभा निवडणूक मतदानात सहभाग घेण्याचे आवाहन मतदारांना करण्यासाठी मुंबई उपनगर जिल्हा निवडणूक कार्यालयातर्फे आज, शुक्रवारी घाटकोपरमध्ये 'लोकशाही-एक उत्सव' या विशेष प्रबोधनपर कार्यक्रमाचे आयोजन करण्यात आले आहे.
निवडणूक आयोगातर्फे 'स्वीप' अर्थात 'सिस्टमॅटिक वोटर्स एज्युकेशन अॅण्ड इलेक्टोरल पार्टिसिपेशन प्रोग्रॅम' या उपक्रमांतर्गत विविध ठिकाणी असे कार्यक्रम घेण्यात येत आहेत. घाटकोपर पूर्व येथील झवेरबेन सभागृहात आज सकाळी १०.३० हा कार्यक्रम होईल. यावेळी सुप्रसिध्द अभिनेत्री निशिगंधा वाड, मधुरा वेलणकर, अभिनेते पुष्कर श्रोत्री, गायिका वैशाली सामंत तसेच जिल्हाधिकारी मिलिंद बोरीकर, केंद्रीय निवडणूक निरीक्षक कृष्ण कुणाल आदी मान्यवर उपस्थित राहणार आहेत. यावेळी समूहगान, मिमिक्री यासारख्या विविध कलांच्या माध्यमातून जनजागृती करत मतदारांना मतदानाचे महत्त्व पटवून देण्यात येणार आहे.