म. टा. विशेष प्रतिनिधी, मुंबई
'मुख्यमंत्री कार्यालय समन्वयक' म्हणून शिवसेनेचे आमदार रवींद्र वायकर यांची नियुक्ती करण्यात आली असून, पदाला कॅबिनेट मंत्रिपदाचा दर्जा देण्यात आला आहे. मुख्यमंत्री उद्धव ठाकरे यांनी ही नेमणूक केली आहे. त्यामुळे आता महाविकास आघाडीचे सर्व आमदार, मंत्री यांचा मुख्यमंत्र्यांशी उत्तम संपर्क तसेच मुख्यमंत्री कार्यालयातील कामकाजावर लक्ष ठेवण्याची जबाबदारी वायकर यांच्यावर असेल.
मुख्यमंत्री ठाकरे यांना मंत्रालयात भेटण्यासाठी संपूर्ण राज्यातून मोठ्या संख्येने लोक निवेदने, तक्रारी घेऊन येत असतात. त्यांचे प्रश्न मार्गी लावण्यासाठी मुख्यमंत्री सचिवालयात ज्येष्ठ व अनुभवी व्यक्तीची आवश्यकता असल्यामुळे वायकर यांची नियुक्ती करण्यात आली आहे. अलीकडेच जिल्हा व विभाग स्तरावर लोकांच्या तक्रारी स्वीकारण्यासाठी विभागीय मुख्यमंत्री सचिवालय सुरू करण्यात आले आहे. त्याची व्याप्ती जिल्ह्यांपर्यंत वाढविण्यात येणार आहे. या सर्व कार्यालयांच्या समन्वयाची जबाबदारी प्रशासकीय अनुभव असणारे रवींद्र वायकर पार पाडतील. वायकर यांना कामकाजासाठी आवश्यक त्या सुविधा तसेच मुख्यमंत्री सचिवालयातील विशेष कार्य कक्षातील अधिकारी-कर्मचारी देण्यात येणार आहेत.
वायकर हे मुख्यमंत्री उद्धव ठाकरे यांचे विश्वासू मानले जातात. त्यांनी मुंबई महापालिकेत चार वेळा स्थायी समिती अध्यक्षपदाची सूत्रे सांभाळली आहेत. जोगेश्वरी विधानसभेमधून तीन टर्म आमदार असलेल्या वायकर यांनी गृहनिर्माण आणि उच्च तंत्र शिक्षण राज्यमंत्री म्हणूनही काम पाहिले आहे. दरम्यान, 'राज्यातील कानाकोपऱ्यातून येणाऱ्या जनतेची वेळच्यावेळी कामे व्हावीत यासाठीच मुख्यमंत्र्यांनी माझी नेमणूक केली आहे. या पदाला न्याय देण्याचा मी पुरेपूर प्रयत्न करेन', अशी प्रतिक्रिया वायकर यांनी व्यक्त केली.